Umunya-Puerto Rico Santiago Jair n’umunya- Montenegro Đorđe Jovović bombi bakina inyuma (Opposite hitter) bakiniraga ikipe ya Kepler VC bamaze gutandukana nayo nyuma y’imikino nyafurika ihuza amakipe yabaye aya mbere iwayo, CAVB Men’s Club Championship 2026 iherutse gusozwa.
Aba bakinnyi bombi bafashije ikipe ya Kepler VC kugera muri 1/4 no kurangiriza ku mwanya wa 7 mu makipe 24 yari yitabiriye irushanwa rya CAVB Men’s Club Championship 2026 riheruka kubera i Kigali mu Rwanda, ryatwawe na Al Ahly SC yo mu Misiri itsinze Police VC ku mukino wa nyuma amaseti 3-0.
Aba bombi bemeje ko batandukanye na Kepler VC babinyujije ku mbuga nkoranyambaga, mu butumwa banditse bwo gushimira no gusezera n’ubwo batatangaje ahandi berekeje.
Mu butumwa bwe, Santiago Jair yashimiye Imana yamuhaye kugira ubushobozi bwo gukina volleyball, ashimira ikipe ya Kepler VC, abafana bayo n’uburyo bamwakiriye.
Santiago yashimiye n’umutoza wa Kepler VC Jean Patrice Ndaki Mboulet wamuhaye umwanya wo gukina ndetse ashimira n’umuyobozi w’iyi kipe Munyampenda Nathalie.
Santiago Jair yageze muri Kepler VC muri Mutarama uyu mwaka, akinira iyi kipe mu mikino yo kwishyura ya Shampiyona, ayifasha kugera mu mikino ya kamarampaka (Playoffs) no kwegukana umwanya wa 3 muri Shampiyona nyuma yo gutsinda Gisagara VC imikino 3-0.
Santiago yari inkingi ya mwamba mu ikipe ya Kepler VC mu mikino ya CAVB Men’s Club Championship 2026, n’ubwo iyi kipe itabashije kwitwara neza cyane ariko n’umwanya wa 7 yasorejeho yawugizemo uruhare rukomeye dore ko muri iri rushanwa muri rusange ariwe mukinnyi wa 6 wakoreye ikipe ye amanota menshi.
Santiago yakoreye Kepler amanota 153 harimo amanota 138 yo kwataka, amanota 6 ya block n’amanota 9 ya serivisi mu mikino 9.
Santiago Jair w’imyaka 31 atandukanye na Kepler VC ntagikombe ayihaye ariko ni umwe mu bakinnyi bigaragaje cyane muri iyi kipe.
Undi mukinnyi watandukanye na Kepler VC ni Đorđe Jovović w’imyaka 25 y’amavuko.
Uyu mukinnyi nawe yashimiye ikipe ya Kepler VC abinyujije ku mbuga nkoranyambaga ze ndetse ashimira na Afurika yose muri rusange.
Đorđe Jovović yageze muri Kepler VC muri Mata uyu mwaka ngo ayifashe mu mikino ya CAVB Men’s Club Championship.
Đorđe Jovović ntiyigeze abona umwanya uhagije wo gukina muri Kepler VC dore ko yarahanganiye umwanya na Santiago Jair bakina ku mwanya umwe.
Muri CAVB Men’s Club Championship, Đorđe Jovović ukinisha ukuboko kw’imoso yakoreye ikipe ya Kepler VC amanota 54 harimo amanota 46 yo kwataka, amanota 5 ya block n’amanota 3 ya serivisi.
Aba bombi bagiye umwaka w’imikino wa Kepler VC utararangira kuko hakiri amarushanwa ari imbere yaba ayo mu Rwanda n’ayo mu mahanga yose iyi kipe ishobora kuzitabira.
Mu marushanwa asigaye Kepler VC ishobora kuzitabira arimo Irushanwa ryo Kwibuka Rutsindura (Tournoi Memorial Rutsindura) rizaba tariki 22-24 z’uku kwezi, Irushanwa ryo Kwibuka (Genocide Memorial Tournament), Irushanwa ryo Kwibohora (Liberation Day), Irushanwa ry’Akarere ka gatanu (Zone 5) n’andi.