Ikipe ya Al Ahly SC yo mu Misiri yegukanye cya CAVB Men’s Club Championship 20206 cyaberaga i Kigali mu Rwanda itsinze Police VC ku mukino wa nyuma amaseti 3-0, biba inshuro ya 17 icyegukanye.
Kuri uyu wa gatandatu tariki 2 Gicurasi 2026 muri BK Arena habereye umukino wa nyuma w’imikino nyafurika ihuza amakipe yabaye aya mbere iwayo muri volleyball mu bagabo, CAVB Men’s Club Championship wahuje Al Ahly SC yo mu Misiri na Police VC yo mu Rwanda.
Uyu mukino wagiye gukinwa aya makipe yombi ataratsindwa umukino n’umwe kuva iri rushanwa ryatangira.
Police VC y’umutoza yageze ku mukino wa nyuma isezereye REG VC nayo yo mu Rwanda naho ikipe ya Al Ahly SC yageze ku mukino wa nyuma isezereye Petrojet SC nayo yo mu Misiri.
Uyu mukino wagiye gukinwa ikipe ya Al Ahly SC ariyo ihabwa amahirwe menshi yo kuwutsinda ikegukana igikombe bishingiwe ku ngingo z’ukuntu iyi kipe yitwaye kuva iyi mikino yatangira.
Uretse kuba Al Ahly SC yarageze ku mukino wa nyuma itaratsindwa, ntanubwo yari bwagatsindwe iseti, ikiyongera kuri ibi; iyi kipe yarisanganywe agahigo ko kuba ariyo ifite ibikombe byinshi bya CAVB Men’s Club Championship mu gihe Police VC yo mu Rwanda ari ubwa kabiri yari yitabiriye iyi mikino, bukaba ubwa mbere igeze ku mukino wa nyuma.
Umukino watangiye Al Ahly yitwara neza itsinda iseti ya mbere ku manota 25-20, yongera gutwara iseti ya kabiri ku manota 25-21.
Mu iseti ya gatatu, Police VC yakoresheje imbaraga nyinshi ariko ntiyabasha kuyitwara kuko nayo yayitsinzwe ku manota 25-22 bituma umukino urangira Al Ahly SC itsinze amaseti 3-0 yegukana igikombe gutyo.
Al Ahly SC yegukanye igikombe ityo, irangiza irushanwa ryose idatsinzwe iseti n’imwe.
Uretse uyu mukino, hanabaye umukino wo guhatanira umwanya wa gatatu wahuje REG VC na Petrojet SC. Uyu mukino warangiye REG VC itsinze amaseti 3-1 biyigira ikipe ya kabiri yo mu Rwanda ibashije kwegukana umudari wa bronze muri iyi mikino nyuma ya Gisagara VC yabikoze muri 2022 ikura umudari muri Tunisia.
Nyuma y’umukino wa nyuma hakurikiyeho umwanya wo gutanga ibihembo.
Habanje guhembwa ikipe nziza y’irushanwa yabonetsemo abakinnyi bane bose bakina mu makipe yo mu Rwanda barimo batatu ba Police VC n’umukinnyi umwe wa REG VC.
Mu ikipe nziza y’irushanwa; abakinnyi babiri bakina imbere (Outside hitters) ni Nicholas Matui ukinira REG VC na Eissa Abdelrahman Elhossiny ukinira Al Ahly SC wanahembwe nk’umukinnyi mwiza w’irushanwa muri rusange, abakinnyi babiri bo hagati (Middle blockers) ni Shyaka Frank ukinira Police VC na Abou Abd Elhalim Mohamed ukinira Al Ahly, usaranganya imipira ni Melly Brian ukinira Police VC, ukina inyuma (Opposite hitter) ni Masso Alvarez Jose Israel ukinira Al Ahly naho libero w’ikipe ni Irakoze Alain ukinira Police VC.
Nyuma y’aha, ikipe ya Al Ahly yashyikirijwe igikombe yari yegukanye ku nshuro yayo ya 17, ikomeza kuba ikipe ya mbere mu mateka imaze kwegukana iki gikombe inshuro nyinshi.
Uretse kuba Al Ahly SC yegukanye igikombe cya CAVB Men’s Club Championship 2026 cyaberaga bwa mbere mu Rwanda no mu gihugu cyo munsi y’ubutayu bwa Sahara muri rusange, yahise ibona n’itike yo kuzakina imikino y’isi ihuza amakipe yabaye aya mbere ku migabane yayo, FIVB Men’s Volleyball Club World Championship.
Urutonde rw’uko irushanwa ryarangiye amakipe yose akurikirana muri rusange:
- Al Ahly SC(Egypt)
- Police VC (Rwanda)
- REG VC (Rwanda)
- Petrojet SC (Egypt)
- Port Autonome de Douala (Cameroon)
- Kenya Ports Authority (Kenya)
- Kepler VC (Rwanda)
- Fath Union Sport (Morocco)
- Ghana Army (Ghana)
- Nemo Stars (Uganda)
- APR VC (Rwanda)
- Nigeria Customs Service (Nigeria)
- Equity Bank VC (Kenya)
- General Service Unit (Kenya)
- Kalibi SC (Ghana)
- Sport-S VC (Uganda)
- Litto Team VC (Cameroon)
- Cameroon Volleyball (Cameroon)
- AS INJS (CĂ´te d’Ivoire)
- Rukinzo VC (Burundi)
- Wolaitta Dicha Sports Club (Ethiopia)
- Black Rhinos VC (Zimbabwe)
- Atlético Clube do Mindelo (Cape Verde)
- Prisons VC (Tanzania