Ikipe ya Kepler VC yatsinze ikipe ya Gisagara VC 3-0 biyiha kwegukana umwanya wa gatatu muri Shampiyona y’u Rwanda mu kiciro cy’abagabo nyuma yo gutsinda imikino 3-0 mu mikino ya kamarampaka.
Umukino wa gatatu mu mikino 5 y’uruhererekane mu guhatanira umwanya wa gatatu muri Shampiyona wakinwe kuri uyu wa gatatu tariki 15 Mata 2026 muri NPC n’ubwo bitabwiwe abafana bose ngo bitabire.
Uyu mukino wagiye gukinwa Kepler y’umutoza Jean Patrice Ndaki Mboulet isabwa kuwutsinda igahita yegukana umwanya wa gatatu kuko yari yaratsinze imikino ibiri ya mbere kandi amakipe aba agomba gukina imikino 5 ariko agatanguranwa gutsinda imikino 3.
Kepler yabigezeho yegukana umudari w’umwanya wa gatatu nyuma yo gutsinda Gisagara VC amaseti 3-0 bigatuma yuzuza intsinzi mu mikino 3, mu gihe Gisagara ntamukino n’umwe yabashije gutsinda n’ubwo yari yarangije ari iya mbere ku rutonde rwa Shampiyona rusanzwe mbere y’imikino ya kamarampaka.
Ni ku nshuro ya mbere Kepler yegukanye umwanya wa gatatu muri Shampiyona kuva yashingwa, umwaka ushize yari yarangije ari iya kane nyuma yo gutsindwa na REG imikino 2-0 mu guhatanira umwanya wa gatatu naho mu mwaka wayo wa mbere muri 2024 yari yageze ku mukino wa nyuma ariko ihatsindirwa na APR VC imikino 2-1.
Nyuma yo kwegukana umwanya wa gatatu, Kepler ubu ihanze amaso imikino nyafurika ya CAVB Men’s Club Championship 2026 izabera mu Rwanda ku nshuro ya mbere kuva tariki 20 Mata 2026.
Kepler VC ikaba izahagararira u Rwanda muri iyi mikino hamwe n’amakipe ya APR VC, REG VC na Police VC.
