Abategura irushanwa ngarukamwaka rya volleyball ryo kwibuka Rutsindura Alphonse batangaje ko amakipe akabakaba 60 ari mu byiciro 10 ariyo yamaze kwiyandikisha ngo azitabire iri rushanwa ribera mu Iseminari Nto ya Butare.
Kuri uyu wa kabiri tariki 19 Gicurasi 2026 nibwo hatangajwe amakipe y’agateganyo yamaze kwiyandikisha yemeza ko azitabira irushanwa ryo Kwibuka Rutsindura, Rutsindura Memorial Tournament 2026, rigiye gukinwa ku nshuro ya 22.
Kuri uru rutonde harimo amakipe 58 agabanyije mu byiciro 10 ibirimo icyiciro cya mbere mu bagore n’abagabo (Serie A), icyiciro cya kabiri mu bagore n’abagabo (Serie A), Abakanyujijeho, Amashuri yisumbuye, Icyiciro rusange (O’Level), Amashuri abanza mu bahungu n’abakobwa (Primary) ndetse n’icyiciro cya volleyball yo ku mucanga (Beach volleyball).
Mu gihe habura iminsi 3 gusa ngo iri rushanwa rikinwe kuko rizakinwa kuva ku wa gatanu tariki 22 Gicurasi kugeza ku Cyumweru tariki 24 Gicurasi 2026, amakipe yo mu cyiciro cya mbere mu bagabo yamaze kwiyandikisha ni Kepler VC, Police VC, APR VC, Gisagara VC, Kirehe VC na REG VC iheruka kwegukana Igikombe cya Shampiyona.
Naho mu cyiciro cy’abagore, harimo amakipe 4 ariyo Kepler WVC, RP Huye WVC, APR WVC na RRA WVC.
Abategura iri rushanwa bemeje ko imikino yose yo mu cyiciro cya mbere izabera muri Gymnase y’Akarere ka Gisagara.
Ubusanzwe imikino y’amatsinda yaberaga muri Gymnase y’akarere ka Gisagara ariko imikino ya nyuma ikabera muri Petit Seminaire Virgo Fidelis de Butare i Huye, mu Ntara y’Amajyepfo.
N’ubwo irushanwa nyirizina ryo kwibuka Rutsindura rizakinwa mu mpera z’iki cyumweru ariko imikino ya mbere y’amatsinda yamaze gukinwa mu cyiciro cy’amashuri yisumbuye no mu cyiciro rusange (O’Level).
Iyi mikino y’amatsinda yasize mu cyiciro cy’amashuri yisumbuye hasigayemo amakipe 4 yageze muri 1/2 ariyo Petit Seminaire Virgo Fidelis de Butare, Gisagara Volleyball Academy, Groupe Scolaire Officiel de Butare na Nyanza TSS.
Naho mu cyiciro rusange, amakipe 4 yageze muri 1/2 ni Petit Seminaire Virgo Fidelis de Butare, College Christ Roi Nyanza, Groupe Scolaire Officiel de Butare na Groupe Scolaire Marie Merci Kibeho.
Rutsindura Memorial Tournament ni irushanwa ngarukamwaka rya volleyball ritegurwa n’Iseminari nto ya Butare, Petit Seminaire Virgo Fidelis de Butare, rikinwa mu rwego rwo kwibuka Rutsindura Alphonse wishwe muri Jenoside yakorewe Abatutsi mu 1994.
Uretse kuba Rutsindura yarize muri iyi Seminari, yanayibayemo ari umwarimu ndetse ari n’umutoza wa volleyball, yanagize uruhare runini mu iterambere ry’uyu mukino muri iri shuri no kugeza ubu volleyball yabaye nk’umuco.
Ku rwego rw’Igihugu, Rutsindura yabaye umusifuzi wa volleyball, aba visi Perezida w’Ishyirahamwe ry’Umukino wa volleyball mu Rwanda, FRVB, atoza ikipe y’igihugu y’u Rwanda mu bagore ndetse atoza n’ikipe ya Rayon Sports.
Ibikorwa byamuranze mbere y’uko yicwa muri Jenoside nibyo byatumye hatangira gutegurwa irushanwa ryo kumwibuka.