Ikipe ya Real Madrid yegukanye igikombe cya Shampiyona y’igihugu ya Espagne La Liga ku nshuro ya 36 mu mateka yayo.
Real Madrid yegukanye La Liga nyuma yo gutsinda ikipe ya Cadiz ibitego 3-0 ku mukino w’umunsi wa 34 wa shampiyona.
Nyuma yo kwegukana iki gikombe habura imikino 4 ya shampiyona, Real Madrid yahise iba ikipe ya mbere ifite ibikombe byinshi bya shampiyona muri shampiyona 5 za mbere zikomeye ku Isi.
Real Madrid ibinganya na Juventus yo mu Butaliyani nayo imaze gutwara ibikombe bya shampiyona y’Ubutaliyani Serie A inshuro 36.
Iki gikombe kibaye icya kabiri cya La Liga umutoza w’umitaliyani Carlo Ancelotti atwaranye na Real Madrid ndetse kibaye igikombe cya 6 cya Shampiyona atwaye mu mateka ye nyuma ya Premier League yatwaranye na Chelsea muri 2010, Ligue 1 yatwaranye na Paris Saint Germain muri 2013, Serie A yatwaranye na AC Milan muri 2004 na Bundesliga yatwaranye na Bayern Munich muri 2017.
Carlo Ancelotti ahise anganya ibikombe yatwaye nk’umutoza wa Real Madrid n’umufaransa Zinedine Zidane, aba bombi bafite ibikombe 12.
Real Madrid iracyakomeje urugendo muri uyu mwaka w’imikino kuko ikiri no mu gikombe cya UEFA Champions League, ikaba igeze muri 1/2 k’irangiza aho igomba gukina umukino wo kwishyura na Bayern Munich nyuma yo kunganya 2-2 mu mukino ubanza.
Ancelotti amaze gutwara UEFA Champions League inshuro 4 mu mateka ye.
