Meta, nyiri Facebook na Instagram, yatangaje ko yakuyeho konti zirenga 756,000 zaketsweho kuba ari iz’abana bari munsi y’imyaka 16 muri Australia.
Iki cyemezo cyafashwe mu rwego rwo kubahiriza itegeko rishya rya Australia ribuza abana bari munsi y’imyaka 16 kugira konti ku mbuga nkoranyambaga, ryatangiye gukurikizwa mu Kuboza 2025.
Imibare ya konti zasibwe 462,000 zari Instagram naho 294,000 zari Facebook. Meta ivuga ko izi konti zakuweho hagati ya Ukuboza 2025 na Kamena 2026.
Impamvu yabyo n’uko Leta ya Australia igamije kurinda abana ingaruka z’imbuga nkoranyambaga, zirimo kumara igihe kinini kuri internet no guhura n’ibitandukanye n’imyaka yabo.
Buri wese ahita yibaza ati bamenya gute ko udafite iyo myaka? Meta ikoresha AI n’isesengura ry’imyitwarire y’abakoresha mu kugenzura imyaka. Iyo isanze konti itujuje ibisabwa, irayifunga kandi ikabuza kongera gufungurwa mu buryo bunyuranyije n’amategeko.
Ikibazo kikiriho n’uko nubwo izo konti zakuweho, raporo zigaragaza ko abana benshi bakiri gukoresha imbuga nkoranyambaga. Ibi bituma hakomeza kubaho impaka ku buryo bwiza bwo kugenzura imyaka.
Ntago ari Meta yonyine iri gukurikiranwa ahubwo hari n’izindi mbuga nkoranyambaga nka TikTok, YouTube na Snapchat. Na byo bisabwa gusobanura uko byubahiriza iri tegeko, mu gihe Australia ikomeje gukaza igenzura.
Gusiba konti zirenga 756,000 ni intambwe ikomeye, ariko ikibazo gikomeje kuba. Ese ibi bizahagarika burundu ikoreshwa ry’imbuga nkoranyambaga n’abana, cyangwa hakenewe izindi ngamba zikomeye kurushaho?