Ikipe ya Bayern Munich y’umutoza Vincent Kompany yegukanye igikombe cya Shampiyona y’umupira w’amaguru mu Budage, Bundesliga, ku nshuro ya 35 mu mateka yayo nyuma yo gutsinda VfB Stuttgart ibitego 4-2 mu mukino w’umunsi wa 30.
Kuri iki cyumweru tariki 19 Mata 2026, ikipe ya Bayern Munich yakiriye ikipe ya VfB Stuttgart ku kibuga cyayo Allianz Arena mu mukino yasabwaga gutsinda cyangwa ikanganya bikayiha kwegukana igikombe cya Shampiyona.
Bayern Munich yisanze muri iyi mibare nyuma y’uko ku wa gatandatu tariki 18 Mata 2026 ikipe ya Borussia Dortmund yariyikurikiye yatsinzwe na Hoffenheim ibitego 2-1.
Ibyo Bayern Munich yasabwaga yabashije kubigeraho itsinda VfB Stuttgart ibitego 4-2 byatsinzwe na Raphael Guerreiro, Nicolas Jackson, Alphonso Davies na Harry Kane biyiha kwegukana igikombe cya Shampiyona y’Ubudage habura imikino 4 ngo Shampiyona irangire.
Kugeza ubu, ikipe ya Bayern Munich yegukanye igikombe cya Shampiyona imaze gutsindwa umukino umwe gusa muri Shampiyona yatsinzwemo na Augsburg muri Mutarama.
N’ubwo imikino ya Shampiyona itararangira ariko ikipe ya Bayern Munich y’umutoza Vicent Kompany yamaze guca agahigo ko kuba ikipe ya mbere imaze imaze gutsinda ibitego byinshi mu mwaka umwe w’imikino wa Bundesliga, kugeza ubu yatsinze ibitego 109.
Iki gikombe cya Bundesliga Bayern Munich yegukanye ni icya 35, kikaba igikombe cya kabiri kikurikiranya umutoza Vicent Kompany amaze gutwara muri iyi kipe ya Bayern Munich.
Umwaka w’imikino ntabwo urarangira kuri Bayern Munich kuko ifite n’amahirwe ko ishobora no gutwara ibikombe 3 bitandunye muri uyu mwaka ibizwi nka treble kuko iyi kipe iri muri 1/2 muri UEFA Champions League aho izahura na Paris Saint Germain ndetse iri no muri 1/2 muri DFB-Pokal aho izahura na Bayer Leverkusen.
Bayern Munich ikomeje kuba ikipe y’igikomerezwa mu Budage n’ibikombe 35 imaze kwegukana mu gihe ikipe ya kabiri yegukanye byinshi mu mateka ari 1. FC Nürnberg yegukanye ibikombe 9 na Borussia Dortmund yegukanye ibikombe 8.