kipe ya Bayer Leverkusen yo mu Budage yegukanye igikombe cya Shampiyona yo muri iki gihugu, Bundesliga, bwa mbere mu mateka yayo.
Bayer Leverkusen yegukanye iki gikombe habura imikino itanu, ni nyuma yo gutsinda Werder Bremen ibitego 5-0 ku munsi wa 29 wa shampiyona igahita irusha Bayern Munich ya kabiri amanota 16.
Ushyize mu mibare: imikino itanu isigaye ihwanye n’amanota 15 kandi Bayer Leverkusen yahise irusha Bayern Munich amanota 16; ibi bivuze ko n’iyo Bayern Munich yatsinda imikino yose isigaye idashobora guca kuri Bayer Leverkusen.
Bayer Leverkusen ibi ibigezeho nyuma y’uko mu mpera za 2022 ubwo umutoza Xabi Alonso yayinjiragamo yari ikipe yarwanaga no kutamanuka gusa aza kuyifasha irangiza iri ku mwanya wa 6 ndetse ikatisha itike yo gukina imikino ya Europa League.
Muri Europa League iyi kipe igeze muri 1/4 k’irangiza ndetse umukino ubanza yabashije gutsinda West Ham United yo mu Bwongereza ibitego 2-0.
Bayer Leverkusen ikimara gutwara igikombe cya Shampiyona, abafana bahise birunda mu kibuga cya BayArena bishimira iyi nsinzi.
Mbere y’uko umukino utangira nabwo abafana ba Bayer Leverkusen kuko bari baziko nibatsinda bahita batwara igikombe, umuhanda ugana kuri stade yabo bawitiriye umutoza Xabi Alonso warugiye kubaha Bundesliga ya mbere mu mateka y’iyi kipe.
Kugeza aka kanya Bayer Leverkusen ntiratsindwa umukino n’umwe w’amarushanwa ayo ariyo yose kuva uyu mwaka w’imikino watangira. Iyi kipe imaze kugeza imikino 43 idatsindwa.
Bayer Leverkusen itwaye Bundesliga nyuma y’imyaka 11 ikurikirana cyarihariwe n’ikipe ya Bayern Munich.
Bayer Leverkusen ni ikipe yashinzwe mu 1904, ikaba ibarizwa i Leverkusen mu Budage.
