Ikipe ya RSSB Tigers ihagarariye u Rwanda mu mikino nyafurika ihuza amakipe yabaye aya mbere iwayo muri basketball mu bagabo, Basketball Africa League 2026 (BAL), yisanze izahura na FUS de Rabat yo muri Maroc mu mikino ya 1/4 izabera i Kigali.
Kuri iki cyumweru tariki 3 Gicurasi 2026 hasojwe imikino yo mu itsinda (Conference) rya Sahara yaberaga muri Prince Moulay Abdellah Sports Complex i Rabat muri Maroc yasize hamenyekanye andi makipe 4 yerekeje muri 1/4 cy’irangiza cya BAL 2026.
Imikino yo muri iri tsinda yasize ikipe ya club Africain yo muri Tunisia, Al Ahly yo mu Misiri, ASC Ville de Dakar yo muri Senegal na FUS Rabat yo Maroc arizo zigeze muri 1/4 mu gihe Maktown Flyers yo muri Nigeria na JCA Kings yo muri CĂ´te d’Ivoire zahise zisezererwa.
Aya makipe 4 yaje asanga andi makipe 4 yabonye itike mu mikino y’itsinda rya Kalahari yabereye muri Afurika y’Epfo ryayobowe na RSSB Tigers yo mu Rwanda yazamukanye n’andi makipe arimo Petro de Luanda yo muri Angola, Al Ahly Ly yo muri Libya na Dar City yo muri Tanzania.
Amakipe ya Nairobi City Thunder yo muri Kenya na Johannesburg Giants yo muri Afurika y’Epfo niyo yasezerewe mu itsinda rya Kalahari.
Nyuma y’uko hamenyekanye amakipe 8 yerekeza muri 1/4, hakozwe urutonde rusange rw’uko amakipe yitwaye birangira ikipe ya RSSB Tigers yisanze ku mwanya wa 3 mu makipe 8, bivuze ko yagombaga guhura n’ikipe ya 6 kuko ikipe ya 1 ihura n’iya 8, iya 2 igahura n’iya 7 naho iya 4 igahura n’iya 5.
Ibi nibyo byatumye RSSB Tigers yisanga izacakirana na FUS de Rabat muri 1/4, ikipe izakomeza hagati y’izi ebyiri ikazahura n’ikipe izatsinda hagati ya Al Ahly na ASC Ville de Dakar muri 1/2, izatsinda ikerekeza ku mukino wa nyuma.
Ni gute imikino yo gukuranwamo izakinwa?
Amakipe yageze muri 1/4 azakina imikino atanguranwa gutsinda imikino 2, mu gihe yatsindanwa umukino 1-1 hazarebwa ku kinyuranyo cy’amanota, ikipe izaba yarashyizemo ikinyuranyo cy’inini niyo izahita yerekeza muri 1/2.
Mu bindi byiciro bikurikiyeho hazajya hakinwa umukino umwe gusa nk’uko byari bisanzwe.
Imikino yo gukuranwamo izaba ryari?
Imikino yo gukuranwamo muri BAL 2026 izongera ibere i Kigali nyuma y’uko umwaka ushize yari yabereye muri Afurika y’Efpo bwari ubwa mbere itabereye i Kigali kuko mu nshuro 4 zari zabanje ariho yari yabereye.
Iyi mikino ya nyuma yo gukuranwamo izabera muri BK Arena kuva tariki 22 Gicurasi kugeza tariki 31 Gicurasi 2026.