Ikipe ya APR VC yatangiye imikino nyafurika ihuza amakipe yabaye aya mbere iwayo muri volleyball mu bagabo, CAVB Men’s Club Championship itsinda Black Rhinos VC amaseti 3-0 mu mukino wanitabiriwe na Perediza w’u Rwanda Paul Kagame.
Kuri uyu wa gatatu tariki 22 Mata 2026 muri BK Arena hatangiye ku mugaragaro imikino ya CAVB Men’s Club Championship ibereye bwa mbere mu gihugu cyo munsi y’ubutayu bwa Sahara.
Iri rushanwa ryafunguwe ku mugaragaro mu muhango witabiriwe na Visi Perezida w’Impuzamashyirahamwe y’Umukino wa Volleball muri Afurika, CAVB, Rwakiranya Louis, Minisitiri wa Siporo mu Rwanda, Mukazayire Nelly na Perezida w’Ishyirahamwe ry’Umukino wa Volleyball mu Rwanda, FRVB, Ngarambe Raphael.
Nyuma y’ibirori byo gufungura ku mugaragaro iri rushanwa hakurikiyeho umukino wa mbere wabimburiye indi yose yo muri iri rushanwa wahuje APR VC na Black Rhinos VC yo muri Zimbabwe, aya makipe yose ni ayo mu itsinda rya mbere, itsinda A.
Uyu mukino watangiye APR VC y’umutoza Sammy Mulinge yitwara neza itwara iseti ya mbere ku manota 25-18.
Nyuma y’iyi seti nibwo Nyakubahwa Perezida wa Repubulika y’u Rwanda, Paul Kagame yinjiye muri BK Arena nawe aje kwihera ijisho uyu mukino ufungura CAVB Men’s Club Championship 2026.
APR VC yari yatangiye neza yakomeje kwitwara neza itwara n’andi maseti abiri ku manota 25-10 no ku manota 25-11 biyiha kwegukana intsinzi ya mbere muri iri rushanwa itsinze amaseti 3-0.
Kuri uyu wa kane tariki 23 Mata 2026 imikino irakomeza hakinwa imikino 11 ibera muri BK Arena no muri Petit Stade harimo n’imikino y’amakipe yo mu Rwanda.
Police VC yo mu Rwanda irakina na Prisons VC yo muri Tanzania saa 14:00 naho REG VC yo mu Rwanda ikine na Port Autonome de Douala yo muri Cameroon saa 18:00, iyi mikino yombi irabera muri BK Arena.
Indi kipe yo mu Rwanda iribukine kuri uyu wa kane ni Kepler VC ikina na AS INJS yo muri Côte d’Ivoire saa 18:00 muri Petit Stade.
Mu yindi mikino iribukinwe kuri uyu wa kane muri BK Arena ni:
Petrojet Sporting Club (EGY) 10:00 Nemostars (UGA)
General Service Unit (KEN) 12:00 Atletico Clube do Mindelo (CPV)
Faith Union Sports (MAR) 16:00 Kenya Ports Authority (KEN)
Cameroon Sports Volleyball (CMR) 20:00 Al Ahly (EGY)
Uretse umukino wa Kepler na AS INJS, indi mikino iribubere muri Petit Stade ni:
Equity Bank (KEN) 12:00 Sport-S (UGA)
Rukinzo (BDI) 14:00 Kalibi Sporting Club (GHA)
Wolaitta Sports Club (ETH) 16:00 Ghana Army (GHA)
Nigeria Customs Service (NGR) 20:00 Litto Team Volleyball (CMR)
