Umwongerezakazi w’imyaka 20, Zoé Backstedt yegukanye Shampiyona y’Isi y’Amagare mu gusiganwa n’igihe (Individual Time Trial) mu kiciro cy’abakobwa batarengeje imyaka 23, yakoresheje imikino 30 n’amasegonda 56.16 ku ntera ya kilometero 22.6.
Si ubwa mbere Zoé Backstedt yegukana umudari wa zahabu muri Shampiyona y’Isi kuko yanayegukanye mu gusiganwa mu muhanda muri Shampiyona y’Isi ya 2021 yabereye mu Bubiligi ndetse icyo gihe yegukanye n’umudari wa silver (Yabaye uwa kabiri) muri ITT mu bangavu batarengeje imyaka 19.
Zoé Backstedt yongeye kwegukana imidari ibiri ya zahabu muri Shampiyona y’Isi mu batarengeje imyaka 19 muri Shampiyona y’Isi yabereye muri Australia muri 2022, yegukanye umudari wo gutwara mu muhanda no muri ITT.
Backstedt yakurikiwe n’umunya-Slovakia Viktória Chladoňová wabaye uwa kabiri arushwa umunota 1 n’amasegonda 50.85, Umutaliyanikazi Federica Venturelli yegukana umwanya wa gatatu arushwa iminota 2 n’amasegonda 11.58.
Kuri uyu wa mbere tariki 22 Nzeri 2025 hakinwe umunsi wa kabiri wa Shampiyona y’Isi y’Amagare iri kubera i Kigali ku nshuro ya mbere ibera muri Afurika. Nyuma y’uko ku Cyumweru hakinwe Individual Time Trial (ITT) mu bagabo n’abagore bakuru, kuri uyu munsi hakinwe ITT mu batarengeje imyaka 23 mu bahungu n’abakobwa.
Ni ubwa mbere ikiciro cy’abakobwa batarengeje imyaka 23 cyari gikinwe muri Shampiyona y’Isi y’Amagare.
Umunyarwandakazi wabimburiye abandi guhaguruka Nyirarukundo Claudette yasoreje ku mwanya wa 32 arushwa iminota 6 n’amasegonda 16.17 na Zoe Bäckstedt wabaye uwa mbere.
Umunyarwandakazi waje hafi ni Ntakirutimana Martha waje ku mwanya wa 27 arushwa n’uwa mbere iminota 5 n’amasegonda 31.23.
Abarangije isiganwa muri rusange ni 45 abandi babiri ntabwo barangije isiganwa mu gihe abandi batatu bataritangiye.
Nyuma y’ikiciro cy’abakobwa, hahise hakurikiraho ikiciro cy’abahungu mu batarengeje imyaka 23 bagombaga gusiganwa ku ntera ya kilometero 31.2.