Ikipe ya Rayon Sports mu bagore yageze ku mukino wa nyuma mu mikino yo gushaka itike ya CAF Champions League nyuma yo gusezerera Kampala Queens yo mu Bugande kuri Penaliti 4-3.
Kuri iki Cyumweru tariki 14 Nzeri 2025 nibwo ikipe ya Rayon Sports yabaye iya mbere mu itsinda B yakinaga na Kampala Queens yazamutse nk’ikipe yatsinzwe neza (Best Looser) yari mu itsinda A muri 1/2 cy’irangiza mu gushaka itike ya CAF Champions League binyuze mu makipe yo muri Afurika y’Iburasirazuba n’iyo Hagati (CECAFA).
Umukino wabereye kuri Ulinzi Complex warangiye mu minota 90 amakipe yombi anganya 0-0 bituma hiyambazwa iminota 30 nayo yarangiye ntakipe ibashije kureba mu izamu ry’indi.
Hahise hiyambazwa penaliti maze zirangira ikipe ya Rayon Sports itsinze Kampala Queens kuri penaliti 4-3 nyuma y’uko umuzamu Ndakimana Angeline akuyemo penaliti 2.
Rayon Sports izakina ku mukino wa nyuma n’ikipe izava hagati ya Police Bullets yo muri Kenya na JKT Queens yo muri Tanzania.
Ikipe izatwara igikombe bizayiha kubona itike yo gukina amatsinda ya CAF Champions League mu bagore.
