Umunya-Portugal Diogo Jota wakiniraga ikipe ya Liverpool yitabye Imana ku myaka 28 azize impanuka y’imodoka muri Espagne.
Kuri uyu wa kane nibwo MARCA yatangaje amakuru yemeza urupfu rwa Diogo Jota, iki kinyamakuru cyanditse ko yaguye mu mpanuka y’imodoka yabereye mu muhanda wa A-52 hafi y’umujyi wa Palacios de Sanabria mu ntara ya Zamora muri Espagne.
Diogo Jota akaba yitabye Imana hamwe n’umuvandimwe we, Andre Silva bari kumwe mu modoka y’ubwoko bwa Lamborgini yarenze umuhanda nyuma y’uko ipine ryayo rituritse igahita ifatwa n’inkongi y’umuriro nk’uko Police ya Espagne yabitangaje.
Umuvandimwe wa Diogo Jota, Andre Silva yari afite imyaka 25 y’amavuko, akaba yakiniraga ikipe ya FC Penafiel yo mu kiciro cya kabiri muri Portugal.
Diogo José Teixeira da Silva wamenyekanye nka Diogo Jota yavutse tariki 4 Ukuboza 1996, avukira i Porto muri Portugal.
Yatangiriye gukina umupira w’amaguru mu ikipe y’abato ya Paços de Ferreira nyuma yaje no kumuzamura mu ikipe nkuru muri 2014.
Mu mwaka wa 2016, Diogo Jota yahise yerekeza mu ikipe ya Atletico Madrid yo muri Espagne gusa yahise imutiza mu makipe ya Porto, Wolverhampton Wanderers ndetse nyuma Wolverhampton Wanderers iramugura muri 2018 mbere yo kwerekeza muri Liverpool muri 2020.
Jota yakinnye imikino 398, atsinda ibitego 136, atanga imipira yavuyemo ibitego 66 mu makipe yose yakiniye naho ikipe y’igihugu ya Portugal yayikiye imikino 49, ayitsindira ibitego 14.
Diogo Jota yatwaye ibikombe 7 birimo igikombe cya Premier League aherutse gutwarana na Liverpool muri uyu mwaka wa 2025, igikombe cya FA Cup yatwaranye na Liverpool muri 2022, ibikombe bibiri bya Carabao Cup yatwaranye na Liverpool muri 2022 na 2024, igikombe cya shampiyona y’ikiciro cya kabiri mu Bwongereza yatwaranye na Wolverhampton Wanderers muri 2018 ndetse n’ibikombe bibiri bya UEFA Nations League yatwaranye n’ikipe y’igihugu ya Portugal muri 2019 na 2025.
Jota yitabye Imana nyuma y’uko yaramaze iminsi mike akoze ubukwe n’umufasha we Rute Cardoso baherutse gusezerana tariki 22 Kamena 2025, aba bombi babyaranye abana batatu.
