Ikipe ya APR VC yegukanye igikombe cy’irushanwa ryo kwibuka Rutsindura nyuma yo gutsinda REG VC ku mukino wa nyuma amaseti 3-2, mu mukino wabereye mu nzu y’imikino n’imyidagaduro (Gymnase) ya Gisagara.
Kuri iki Cyumweru tariki 24 Gicurasi 2026 hasojwe irushanwa rya volleyball ryo kwibuka Rutsindura Alphonse wishwe muri Jenoside yakorewe Abatutsi mu 1994, ryakinwaga ku nshuro yaryo ya 22.
Mbere y’uko iri rushanwa risozwa kuri iki cyumweru, hatuwe igitambo cyo gusabira Rutsindura n’umuryango we ndetse kinitabirwa na murumuna w’uwari umugore we Mukarubayiza Verene.
Mbere y’uko umunsi w’irushanwa nyirizina ugera, ku wa kane tariki 21 Gicurasi 2026 habaye tombola y’amatsinda y’uko amakipe akabakaba 60 yo mu byiciro bitandukanye azagenda akina.
Imikino yatangiye ku wa gatanu tariki 22 Gicurasi 2026 haba umukino umwe wo mu cyiciro cya mbere mu bagabo ari nawo wafunguye irushanwa, wahuje Gisagara VC na Police VC, uyu mukino wabereye muri Gymnase y’Akarere ka Gisagara ari naho imikino y’icyiciro cya mbere yose yabereye, umukino watangiye saa 18:00.
Uyu mukino warangiye Gisagara VC itsinze amaseti 3-1, biyiha amahirwe yo gukomeza muri 1/2 kuko mu itsinda B ryarimo amakipe 3, indi kipe yarimo ni Kirehe VC.
Ku wa Gatandatu tariki 23 Gicurasi 2026 imikino yarakomeje mu byiciro bitandukanye, ikabera ku bibuga bitandukanye byo mu Mujyi wa Huye birimo muri Petit Seminaire Virgo Fidelis de Butare, Rectorat, RP Huye, na UR Huye.
Mu mikino yaberaga i Gisagara, Police VC yatsinze Kirehe VC amaseti 3-0. Hakurikiyeho umukino wo mu itsinda A ryarimo amakipe abiri wahuje APR VC na REG VC warangiye APR VC itsinze amaseti 3-0, naho umukino w’amatsinda wa nyuma wahuje Gisagara VC na Kirehe VC urangira Gisagara itsinze amaseti 3-0 biyiha kuzamuka ari iya mbere mu itsinda B naho Kirehe ihita isezererwa.
Nyuma y’iyi mikino hahise hakinwa imikino ya 1/2 aho ikipe ya mbere mu itsinda A, yahuye n’ikipe ya kabiri mu itsinda B naho ikipe ya kabiri mu itsinda A ihura n’ikipe ya mbere mu itsinda B.
Habanje umukino wahuje APR VC na Police VC warangiye APR VC igeze ku mukino wa nyuma itsinze Police VC amaseti 3-2.
Nyuma y’uyu mukino hakurikiyeho umukino wahuje Gisagara VC na REG VC, uyu mukino warangiye REG VC itsinze Gisagara VC amaseti 3-1 biyiha gusanga APR VC ku mukino wa nyuma.
Bucyeye bwaho nibwo hakinwe umukino wo guhatanira umwanya wa gatatu warangiye warangiye Gisagara VC itsinze Police VC amaseti 3-2 naho ku mukino wa nyuma APR VC itsinda REG VC amaseti 3-2 yongera kwegukana irushanwa rya Rutsindura yaherukaga gutwara muri 2009.
Muri iri rushanwa, Gisagara VC yari ifite abakinnyi buzuye ndetse yanongeyemo umukinnyi ukina yataka (Outside hitter) w’umugande, Apunyo Cosmas Elijah, ikipe ya APR VC nayo yari ifite abakinnyi bayo bose uretse umutoza mukuru Sammy Mulinge utaruhari naho ikipe ya Kirehe VC nayo yari ifite benshi mu bakinnyi bayo isanganywe ndetse yiyambaje bamwe mu bakinnyi basanzwe bakina muri Shampiyona y’u Rwanda ngo bayifashe barimo Dukuze Ngabonziza Arnaud usanzwe ukinira RP Ngoma na Tuyizere Aimable usanzwe ukinira KVC.
Ikipe ya Police VC yitabiriye iyi mikino idafite abakinnyi bayo 3 basanzwe babanzamo barimo Angiro Gideon wagiye mu ikipe y’igihugu ya Uganda na Makuto Elphas na Melly Brian bagiye mu ikipe y’igihugu ya Kenya naho ikipe ya REG VC yitabiriye iri rushanwa ifite abakinnyi 10 batarimo abakinnyi 5 basanzwe babanza mu kibuga n’umutoza mukuru Mugisha Bavuga Benon.
Ntanteteri Crispin niwe mukinnyi rukumbi usanzwe ubanza mu kibuga warikumwe n’ikipe ya REG VC muri iyi mikino.
Mu bindi byiciro, Keystone VC yegukanye igikombe mu cyiciro cya kabiri (Serie B) mu bagabo nyuma yo gutsinda Win Star ku mukino wa nyuma amaseti 3-0. Umwanya wa 3 wegukanwe na CUR itsinze Rwanda Young Water Professional amaseti 3-0.
Mu cyiciro cya kabiri mu bagore igikombe cyegukanwe na Ecole Sainte Bernadette Kamonyi nyuma yo gutsinda RP Kigali ku mukino wa nyuma amaseti 3-2. Lycee de Nyanza yegukanye umwanya wa gatatu itsinze TTC Save amaseti 3-1.
Mu cyiciro cy’amashuri yisumbuye (Junior), Nyanza TSS yegukanye igikombe nyuma yo gutsinda Gisagara VA amaseti 3-2 ku mukino wa nyuma. Petit Seminaire Virgo Fidelis de Butare yarifite igikombe giheruka yegukana umwanya wa gatatu itsinze Groupe Scolaire Officiel de Butare (Indatwa n’Inkesha School) amaseti 3-1.
Mu cyiciro rusange (O’Level), Petit SĂ©minaire Virgo Fidelis yegukanye igikombe nyuma yo gutsinda GS Marie Merci Kibeho amaseti 3-0 ku mukino wa nyuma. College Christ Roi Nyanza yegukana umwanya wa 3 itsinze GSOB.
Mu cyiciro cy’amashuri abanza (Primary), GS Kigeme yegukanye igikombe mu bahungu nyuma yo gutsinda GS Mugombwa ku mukino wa nyuma amaseti 2-1 (Bakinnye best of 3). EP Mugombwa yegukana umwanya wa 3 nyuma yo gutsinda EP Matyazo amaseti 2-0 naho mu bakobwa igikombe cyegukanwe na GS Gatovu nyuma yo gutsinda GS Mugombwa ku mukino wa nyuma amaseti 2-0 (Bakinnye best of 3). GS Gikore yegukana umwanya wa 3 nyuma yo gutsinda EP Bwama amaseti 2-0.
Mu cyiciro cy’abakanyujijeho (Veterans), ikipe ya Umucyo VC yegukanye igikombe nyuma yo gutsinda Kinyinya VC ku mukino wa nyuma amaseti 3-2. Kudum yegukana umwanya wa 3 nyuma yo gutsinda ikipe ya ASEVIF.
Mu cyiciro cya volleyball yo ku mucanga (Beach Volleyball), ikipe ya Serge na Olivier yegukanye igikombe nyuma yo gutsinda ikipe ya Pierre na Murindwa ku mukino wa nyuma naho ikipe ya Ignace na Bosco yegukana umwanya wa gatatu.
Rutsindura Memorial Tournament ni irushanwa rya volleyball rikinwa mu rwego rwo kwibuka Rutsindura Alphonse wabaye umurezi n’umutoza wa volleyball muri Petit Seminaire Virgo Fidelis de Butare, wishwe muri Jenoside yakorewe Abatutsi mu 1994.
Ku rwego rw’igihugu, Rutsindura yabaye umutoza wa Rayon Sports n’ikipe y’igihugu y’abagore, yabaye visi Perezida w’Ishyirahamwe ry’Umukino wa Volleyball mu Rwanda, FRVB, ndetse aba n’umusifuzi.
Mu 1996 nibwo hatangiye gutegurwa irushanwa ryo kwibuka Rutsindura kubera ibikorwa by’indashyikirwa byamuranze byiganjemo guteza imbere volleyball.
Amateka avuga ko no mu gihe abanyeshuri batabaga bari mu gihe cyo kwiga, Rutsindura yatozaga abana mu biruhuko i Gisagara, mu murenge wa Ndora ari naho avuka, ibi byerekana ishyaka yarwanaga mu gutuma umukino wa volleyball urushaho gutera imbere mu Rwanda.
Rutsindura yari yarashakanye na Mukarubayiza Verene, babyarana abana bane aribo Ikirezi Alaine, Iliza Alain, Izere Arsene na Icyeza Alida.
Uyu muryango wose warishwe muri Jenoside yakorewe Abatutsi mu 1994, uretse Ikirezi Alaine niwe ukiriho gusa.