Ikipe ya Aston Villa yabonye itike yo kuzakina imikino ya UEFA Champions League y’umwaka utaha w’imikino nyuma yo gutsinda Liverpool ibitego 4-2 mu mukino wa Shampiyona.
Uyu mukino wabaye mu ijoro ryatambutse ryo kuri uyu wa gatanu tariki 15 Gicurasi 2026 kuri Sitade ya Aston Villa, Villa Park, ukaba wari umukino w’umunsi wa 37 wa Shampiyona y’Ubwongereza, English Premier League.
Ibitego bya Aston Villa byatsinzwe na Morgan Rogers ku munota wa 42, Ollie Watkins watsinze ibitego 2 ku minota ya nyuma y’igice cya mbere no ku munota wa 57 na John McGinn watsinze igitego ku munota wa 89.
Ku rundi ruhande, ibitego byombi bya Liverpool byatsinzwe na Virgil van Dijk ku munota wa 52 n’ikindi yatsinze mu minota ya nyuma y’umukino.
Nyuma yo gutsinda uyu mukino, Aston Villa yahise ifata umwanya wa 4 ku rutonde rw’agateganyo rwa Shampiyona n’amanota 62, ikarusha Liverpool ya 5 amanota 3 ndetse ikarusha na AFC Bournemouth ya 6 amanota 7.
Ibi bivuze ko mu mikino isigaye bidashoboka ko Aston Villa yarangiriza ku mwanya urenze uwa 5, bityo yamaze kubona itike yo kuzakina Imikino Ihuza Amakipe Yabaye aya Mbere Iwayo ku Mugabane w’Uburayi, UEFA Champions League, y’umwaka utaha w’imikino kuko byamaze kwemezwa ko amakipe 5 yo mu Bwongereza ariyo azitabira iyi mikino.
Aston Villa yaherukaga muri UEFA Champions League mu mwaka wa 2024/25 aho yaviriyemo muri 1/4 isezerewe na Paris Saint Germain.
Kuri ubu Aston Villa y’umutoza Unai Emery ihanze amaso umukino wa nyuma wa UEFA Europa League izahuramo na Freiburg yo mu Budage ku wa gatatu tariki 20 Gicurasi 2026, i Istanbul muri Turkey, mbere yo gukina umukino wayo wa nyuma wa Shampiyona izahuramo na Manchester United.