Ishyirahamwe ry’Umupira w’Amaguru mu Burayi, UEFA, ryatangaje abasifuzi bazayobora umukino wa nyuma wa Champions League uzahuza Arsenal na Paris Saint Germain tariki 30 Gicurasi 2026 i Budapest muri Hungary kuri Puskas Arena.
UEFA yatangaje ko umusifuzi wo hagati uzayobora uyu mukino ari umudage Daniel Siebert uzaba wungirijwe n’abandi badage Jan Seidel na Rafael Foltyn bazasifura ku ruhande ndetse n’umusuwisi Sandro Schärer uzaba ari umusifuzi wa kane.
Umusifuzi w’umusimbura azaba ari umunya-Espagne Guadalupe Porras Ayuso naho abazaba bari kuri VAR bazaba bayobowe n’umudage Bastian Dankert yungirijwe n’undi mudage Robert Schröder ndetse na n’umunya-Espagne Carlos Del Cerro Grande.
Daniel Siebert w’imyaka 42 si umukino wa mbere azaba asifuye muri UEFA Champions League dore ko yasifuye imikino 9 harimo umukino ubanza wa 1/4 wahuje Arsenal na Sporting Lisbon n’umukino wo kwishyura wa 1/2 wahuje Arsenal na Atletico Madrid.
Siebert abaye umusifuzi wa gatanu w’umudage ugiye gusifura umukino wa nyuma wa UEFA Champions League nyuma ya Hellmut Krug, Markus Merk, Herbert Fandel na Felix Brych.