Ikipe ya Al Nassr ya kizigenza Cristiano Ronaldo ishobora kwegukana igikombe cya Shampiyona ya Saudi Arabia, Saudi Pro League kikaba igikombe cya Shampiyona cya mbere Ronaldo yaba yegukanye ari muri iyi kipe.
Ibi Al Nassr ishobora kubigeraho kuri uyu wa kabiri tariki 12 Gicurasi 2026 mu mukino w’umunsi wa 33 uri bwakiremo ikipe ya Al Hilal saa mbiri z’ijoro.
Kugeza ubu Al Nassr ni iya mbere muri Shampiyona n’amanota 82 mu mikino 32, mu gihe Al Hilal ari iya kabiri n’amanota 77 mu mikino 31 imaze gukina.
Ibi bivuze ko Al Nassr kugira ngo itware igikombe isabwa gutsinda uyu mukino cyangwa mu gihe yawunganya bikayisaba kuzatsinda umukino umwe yaba isigaje kugira ngo itware igikombe.
Ku ruhande rwa Al Hilal ikinamo Karim Benzema wanakinanye na Ronaldo muri Real Madrid, irasabwa gutsinda imikino yose isigaje kugira ngo yegukane igikombe cya Shampiyona y’uyu mwaka harimo n’umukino iraza guhuramo na Al Nassr.
Cristiano Ronaldo yageze muri Al Nassr mu Ukuboza 2022 avuye muri Manchester United, kuva icyo gihe yagera muri iyi kipe yegukanye igikombe kimwe, ni igikombe cya Arab Club Champions Cup yegukanye muri 2023.