Bwa mbere mu mateka ikipe ya FC Barcelona yatwaye igikombe cya Shampiyona ya Espagne, La Liga, igitwariye kuri Real Madrid nyuma yo kuyitsinda ibitego 2-0 ku mukino w’umunsi wa 35.
Mu ijoro ryo kuri iki cyumweru tariki 10 Gicurasi 2026 nibwo ikipe ya FC Barcelona yari yakiriye Real Madrid kuri sitade yayo Spotify Camp Nou.
Uyu mukino uzwi nka El Clásico warufite igisobanura cyane ku ikipe ya FC Barcelona yari mu rugo kuko yasabwaga gutsinda cyangwa ikanganya bigahita biyiha kwegukana igikombe cya Shampiyona y’uyu mwaka.
Ibi FC Barcelona yabigezeho nyuma yo gutsinda Real Madrid ibitego 2-0 byombi byabonetse mu gice cya mbere cy’umukino.
Marcus Rashford niwe wafunguye amazamu kuri kufura ku munota wa 9 w’umukino maze ku munota wa 18 Ferran Torres aterekamo igitego cya kabiri cya Real Madrid ku mupira mwiza yarahawe na Dani Olmo.
FC Barcelona yahise yegukana igikombe kuko ku rutonde rwa Shampiyona yahise igira amanota 91, ihita irusha Real Madrid ya 2 amanota 14 kandi hasigaye imikino 3 gusa ngo Shampiyona irangire. Ibi bivuze ko niyo Real Madrid yatsinda imikino yose isigaye yakiyongeraho amanota 9 ntibiyihe guca kuri FC Barcelona.
FC Barcelona yari yambaye ikirango (Logo) cy’umuhanzi w’umunyamerika Olivia Rodrigo kubera ubufatanye ibitanye na Spotify yegukanye igikombe ya Shampiyona ya Espagne ku nshuro ya kabiri yikurikiranya, kiba igikombe cya 29 yegukanye muri rusange.
FC Barcelona niyo kipe ya kabiri imaze kwegukana ibikombe bya Shampiyona byinshi nyuma ya Real Madrid yegukanye ibikombe 36.