Ikipe ya Real Madrid yatangaje ko Federico Valverde na Aurélien Tchouaméni baherutse kurwana mu myitozo bamaze kwiyunga ariko ikipe ibaha igihano cyo kwishyura amande y’ibihumbi 500 by’ama euros kuri buri umwe.
Kuri uyu wa gatanu tariki 8 Gicurasi nibwo ikipe ya Real Madrid yatangaje ko nyuma y’uko abakinnyi bayo bakina mu kibuga hagati Federico Valverde na Aurélien Tchouaméni baherutse kurwana bamaze gusabana imbabazi no kwiyunga.
Real Madrid yatangaje ko aba bakinnyi bombi basabanye imbabazi, basaba imbabazi ikipe, basaba imbabazi abakinnyi bakinana, basaba imbabazi abatoza, basaba imbabazi abafana ndetse bombi bemera ibihano ikipe igomba kubaha.
Imirwano y’aba bakinnyi yabaye kuri uyu wa kane tariki 7 Gicurasi 2026 yaviriyemo Federico Valverde gukomereka ku mutwe ndetse no gutakaza ubwenge n’ubwo kugeza ubu ameze neza.
Muri Real Madrid hakomeje gututumba umwuka mubi mbere y’umukino ukomeye ifitanye na mukeba wayo FC Barcelona ku cyumweru tariki 10 Gicurasi 2026 kuko uretse aba bombi barwanye n’abakinnyi bakina bugarira bayo Antonio Rudiger na Álvaro Fernández Carreras bakozanyijemo mu myitozo.
Andi makuru ava muri iyi kipe ahamya ko hari abakinnyi 6 banze kuvugana n’umutoza mukuru Álvaro Arbeloa, hakaba umukinnyi Kylian Mbappe wagize ikibazo cy’imvune ariko aho kugumana n’ikipe agahita yigira mu biruhuko n’umukunzi we mu Butaliyani byatumye abafana b’iyi kipe basaba ko yanayisohokamo.
Kugeza ubu Real Madrid ni iya kabiri ku rutonde rwa Shampiyona ya Espagne n’amanota 77 inyuma ya FC Barcelona ya mbere ifite amanota 88 mu gihe habura imikino 4 gusa ngo Shampiyona irangire.
FC Barcelona nibasha gutsinda Real Madrid izahita yegukana igikombe cya Shampiyona mu buryo budasubirwaho, bizaba bivuze ko Real Madrid imaze imyaka 2 idatwara igikombe na kimwe dore ko kugeza ubu igikombe cya Shampiyona aricyo iri guharanira gusa kuko mu bindi bikombe byose yavuyemo.