Ikipe ya Inter Milan yegukanye igikombe cya Shampiyona y’Ubutaliyani, Serie A, ku nshuro ya 21 mu mateka nyuma yo gutsinda Parma ibitego 2-0 bigatuma irusha ikipe ya kabiri amanota 12 mu gihe habura imikino 3 gusa kugira ngo Shampiyona irangire.
Kuri iki cyumweru tariki 3 Gicurasi 2026 ikipe ya Inter Milan yari yakiriye ikipe ya Parma kuri sitade yayo Giuseppe Meazza.
Inter Milan yasabwaga gutsinda uyu mukino igahita yegukana igikombe cya Shampiyona nyuma y’uko Napoli ya kabiri yari yaranganyije na Como 1907 ku wa gatandatu.
Inter Milan ibyo yasabwaga yabigezeho itsinda umukino ku bitego 2-0 byatsinzwe na Marcus Thuram ku munota wa 45 na Henrikh Mkhitaryan ku munota wa 80.
Iyi ntsinzi yatumye Inter Milan ihita irusha Napoli ya kabiri amanota 12, irusha AC Milan ya gatatu amanota 15 kandi habura imikino 3 gusa ngo Shampiyona irangire, ibi byatumye ihita yegukana igikombe cya Shampiyona y’uyu mwaka.
Iki ni igikombe cya mbere cya Serie A umutoza wa Inter Milan, Cristian Chivu yegukanye nk’umutoza mukuru w’iyi kipe mu mwaka we wa mbere cyiyongera kuri bitatu yegukanye ubwo yari umukinnyi w’iyi kipe.
Inter Milan ikomeje kuba ikipe ya kabiri yegukanye ibikombe byinshi bya shampiyona mu Butaliyani imbere ya AC Milan yegukanye ibikombe 19, ikaza inyuma ya Juventus yatwaye ibikombe 36.
Inter Milan yongeye kwisubiza ikuzo nyuma y’uko mu mwaka ushize w’imikino yari yatakaje igikombe cya Shampiyona ku mukino wa nyuma cyegukanwe na Napoli ndetse ikanatsindirwa ku mukino wa nyuma wa UEFA Champions League ibitego 5-0 na Paris Saint Germain.
Inter Milan iracyafite amahirwe yo gutwara n’ikindi gikombe kuko iri ku mukino wa nyuma wa Coppa Italia izahuramo na Lazio kuri Olympic Stadium tariki 13 Gicurasi 2026.