Mu buryo budasubirwaho, hagati ya REG VC na Police VC zombi zo mu Rwanda hazagira ikipe imwe ikina umukino wa nyuma w’imikino nyafurika ihuza amakipe yabaye aya mbere iwayo muri volleyball mu bagabo, CAVB Men’s Club Championship bwa mbere mu mateka y’iri rushanwa ndetse no ku makipe yo mu Rwanda.
Ibi byagezweho nyuma y’aho ikipe ya REG VC isezereye Kenya Ports Authorty muri 1/4 cy’irangiza iyitsinze amaseti 3-1 kandi ikipe yagombaga gukomeza hagati y’aya makipe yombi yagombaga guhura n’ikipe ikomeza hagati ya Police VC na Kepler VC muri 1/2.
Kuri uyu wa kane tariki 30 Mata 2026 muri Petit Stade no muri BK Arena hakomeje imikino ya CAVB Men’s Club Championship 2026.
By’umwihariko, muri BK Arena niho habereye imikino ya 1/4 cy’irangiza yasize amakipe abiri yo mu Rwanda ageze muri 1/2 mu gihe indi imwe yasezerewe.
REG VC niyo yabimburiye andi makipe kubona itike ya 1/2 nyuma yo kwihanangiriza ikipe ya Kenya Ports Authority mu mukino utari woroshye ikayitsinda amaseti 3-1 (28-26, 25-18, 17-25, 30-28).
Ni ubwa mbere mu mateka ya REG VC yarigeze ku rwego nk’uru kuva yashingwa muri iri rushanwa.
Nyuma y’uyu mukino hakurikiyeho umukino wahuje ibigugu byo mu Rwanda, Kepler VC na Police VC.
Uyu mukino warugoye cyane warangiye Police VC y’umutoza Musoni Fred igeze muri 1/2 ku nshuro yayo ya mbere mu mateka, dore ko ari ni inshuro yayo ya kabiri iri gukina iri rushanwa nyuma yo gutsinda Kepler VC amaseti 3-2 (25-27, 25-19,24-26, 25-19, 15-9).
Police VC yabonye iyi ntsinzi iyikesha by’umwihariko block nziza no kugira serivisi nziza zagoye ikipe ya Kepler VC.
Musoni Fred utoza iyi kipe yabaye umutoza wa kabiri w’umunyarwanda ubashije kugeza ikipe muri 1/2 cya CAVB Men’s Club Championship nyuma ya Nyirimana Fidele wabikoze muri 2011 no muri 2022.
Andi makipe yageze muri 1/2 arimo ikipe ya Petrojet SC yo mu Misiri yageze muri 1/2 isezereye Port Autonome de Douala yo muri Cameroon iyitsinze amaseti 3-1 na Al Ahly SC nayo yo mu Misiri yasezereye Fath Union Sport yo muri Maroc iyitsinze amaseti 3-0.
Ibi bivuze ko muri 1/2 hageze amakipe abiri yo mu Rwanda n’amakipe abiri yo mu Misiri.
Kuri uyu wa gatanu tariki 1 Gicurasi 2026, harakinwa imikino ya 1/2 muri BK Arena, saa kumi n’ebyiri z’umugoroba, REG VC iracakirana na Police VC naho saa mbiri z’ijoro Petrojet SC icakirane na Al Ahly.
Uretse iyi mikino ya 1/2 yakinwe kuri uyu wa kane, hakinwe n’imikino yo guhatanira imyanya aho APR VC yo mu Rwanda yitwaye neza igatsinda Kalibi SC yo muri Ghana amaseti 3-0 (25-20, 25-21, 25-16) mu mikino yo guhatanira umwanya wa 9-16.
APR VC iragaruka mu kibuga kuri uyu wa gatanu ikina na Ghana Army mu guhatanira umwanya wa 9-12. Uyu mukino urabera muri Petit Stade saa kumi z’umugoroba.
Kepler VC nayo iragaruka mu kibuga kuri uyu wa gatanu nyuma yo gusezererwa muri 1/4 ikina na Kenya Ports Authority saa kumi z’umugoroba mu guhatanira umwanya wa 5-8.
Dore uko imikino yose yo kuri uyu munsi yarangiye:
Imikino ya 1/4
Kenya Ports Authority (KEN) 1-3 REG VC (RWA)
(26-28, 18-25, 25-17, 28-30)
Police VC (RWA) 3-2 Kepler VC (RWA)
(25-27, 25-19, 24-26, 25-19, 15-9)
Port Autonome De Douala (Cameroun) 1-3 Petrojet Sporting Club (Egypt)
(23-25, 25-18, 14-25, 23-25)
Al Ahly Sporting Club (Egypt) 3-0 Fath Union Sport (Maroc)
(25-19, 25-15, 25-20)
Imikino yo guhatanira imyanya ya 9-16
Nemo Stars VC (UGA) 3-0 Sport-S VC (UGA)
(25-16, 25-22, 25-23)
Equity Bank VC (KEN) 0-3 Ghana Army (GHA)
(12-25, 16-25, 18-25)
Nigeria Customs Service (NGR) 3-2 General Service Unit (KEN)
(18-25, 25-23, 25-22, 19-25, 15-13)
Kalibi SC (GHA) 0-3 APR VC (RWA)
(20-25, 21-25, 16-25)
Imikino yo guhatanira imyanya ya 17-20:
Litto Team Volleyball (CMR) 3-0 AS INJS (CIV)
(25-19, 29-27, 25-20)
Cameroon Sports Volleyball (CMR) 3-0 Rukinzo VC (BDI)
(25-19, 25-16, 25-23)
Imikino yo guhatanira imyanya ya 21-24
Atletico Clube Do Mindelo (CPV) 0-3 Wolaitta Dicha Sports Club (ETH)
(18-25, 11-25, 19-25)
Prisons VC (TAN) 0-3 Black Rhinos VC (ZIM)
(10-25, 22-25, 18-25)