Ishyirahamwe ry’Umupira w’Amaguru mu Rwanda, FERWAFA, ryafashe umwanzuro wo guhagarika by’agateganyo umutoza wongerera ingufu abakinnyi b’Amagaju FC, Imurora Hakizimana Japhet ndetse n’umukozi ushinzwe ibikoresho wa Gorilla FC, Ndatimana Olivier mu bikorwa by’umupira w’amaguru mu Rwanda bazira imyitwarire mibi.
Mu itangazo FERWAFA yashyize hanze kuri uyu wa gatanu tariki 24 Mata 2026 rivuga ko aba bombi bahanwe hashingiwe ku ngingo ya 2.1 (Igika cya 1) n’iya 2.3.3 z’amategeko agenga imyitwarire muri iri shyirahamwe.
Ndatimana Olivier ushinzwe ibikoresho muri Gorilla FC yahagaritswe nyuma y’imyitwarire idahwitse yagaragaje mu mukino w’Igikombe cy’Amahoro wahuje Gorilla FC na Rayon Sports FC ku wa 22 Mata 2026 kuri Kigali Pele Stadium.
Kuri uyu mukino ubanza wa 1/2 cy’irangiza warangiye Gorilla FC inganyije na Rayon Sports igitego 1-1, Ndatimana yagaragaye anyanyagiza ibintu by’umweru mu mirongo y’ikibuga byaketswe ko byari amarozi.
Ku rundi ruhande, Imurora Hakizimana Japhet yahagaritswe kubera imyitwarire idahwitse yamugaragayeho mbere y’umukino wa Shampiyona wahuje Musanze FC na Amagaju FC ku wa 17 Mata 2026 kuri Sitade Ubworoherane i Musanze.
Mbere y’uyu mukino warangiye Musanze FC itsinzwe na Amagaju FC ibitego 2-0, humvikanye amajwi ya Imurora avugana n’umuzamu wa Musanze FC, Habarurema Gahungu amusaba ko yaza kwitsindisha ibizwi mu ndimi z’amahanga nka “Match fixing.”
FERWAFA yakomeje ivuga ko aba bombi bahagaritswe mu bikorwa byose bijyanye n’umupira w’amaguru, banabujijwe kwinjira mu gace ka tekiniki, mu rwambariro no ku kibuga haba mu myitozo no mu mikino, kugeza igihe hazafatirwa icyemezo cya nyuma na Komisiyo ishinzwe imyitwarire.
