Nyuma yo kwitwara neza mu mikino y’amatsinda ya BAL 2026 ikazamuka iyoboye itsinda rya Kalahari, ikipe ya RSSB Tigers yasubukuye imikino ya Shampiyona yitwara neza itsinda Inspired Generation amanota 95-52.
Nyuma y’iminsi 10 Shampiyona y’u Rwanda ya Basketball mu bagabo yarimaze idakinwa kubera icyumweru cy’icyunamo, muri iki cyumweru yarasubukuwe hakinwa imikino yo kwishyura.
Mu mikino yabaye ku wa gatatu tariki 15 Mata 2026, EAUR BBC yatsinze AZOMCO amanota 75-71 naho ikipe ya Kepler BBC itsinda Inspired Generation amanota 88-45.
Kuri uyu wa gatanu tariki 17 Mata 2026 imikino ya Shampiyona yakomeje ibera muri Petit Stade i Remera.
Umukino wa mbere wahuje RSSB Tigers BBC na Inspired Generation warangiye RSSB Tigers itsinze amanota 95-52.
Bizimana Paul yitwaye neza muri uyu mukino atsinda amanota 22, akora rebounds 10, yaka umupira (Steals) inshuro 2 ndetse atanga imipira 3 yavuyemo amanota.
RSSB Tigers y’umutoza Henry Mwinuka yakinnye uyu mukino idafite Antino Jackson Jr usanzwe ari inkingi ya mwamba muri iyi kipe ariko ntibyayibujije kwitwara neza imbere ya Inspired Generation itaratsinda umukino n’umwe kuva shampiyona yatangira.
RSSB Tigers yaherukaga gukina umukino wa Shampiyona tariki 1 Werurwe 2026 ubwo yatsindaga APR BBC amanota 89-80.
Nyuma y’uyu mukino hakurikiyeho umukino wahuje REG BBC na EAUR BBC ikunze kwihagararaho n’ubwo ari kipe yazamutse mu cyiciro cya mbere uyu mwaka.
Uyu mukino warangiye REG BBC ibonye intsinzi y’amanota 86-67 imbere ya EAUR BBC.
Furaha Cadeau de Dieu yitwaye neza muri uyu mukino atsinda amanota 22, akora rebounds 3, atanga imipira 2 yavuyemo amanota ndetse yambura umupira inshuro 2.
Kugeza ubu Patriots BBC niyo ya mbere ku rutonde rw’agateganyo rwa Shampiyona n’intsinzi 7 mu mikino 10, ikurikirwa na REG BBC n’intsinzi 6 mu mikino 9, APR BBC ni iya gatatu n’intsinzi 7 mu mikino 8, EAUR BBC ni iya kane n’intsinzi 4 mu mikino 11, RSSB Tigers iri ku mwanya wa gatanu n’intsinzi 6 mu mikino 7, AZOMCO ni iya gatandatu n’intsinzi 3 mu mikino 10, Kepler BBC ni iya karindwi n’intsinzi 4 mu mikino 8 inganya na UGB ya munani, zigatandukanywa n’uko Kepler yizigamye amanota 71, UGB ikaba yizigamye amanota 22 naho ikipe ya Inspired Generation ni iya nyuma, ntantsinzi ifite mu mikino 11 imaze gukina.
Imikino ya Shampiyona ya basketball irakomeza kuri iki cyumweru muri BK Arena hakinwa imikino itatu:
Kepler BBC 15:00 AZOMCO
Inspired Generation 17:30 REG BBC
Patriots BBC 20:00 UGB