Ambasaderi w’u Rwanda muri Afurika y’Epfo, Hategeka Emmanuel yasuye ikipe ya RSSB Tigers izahagararira u Rwanda mu mikino nyafurika ihuza amakipe yabaye aya mbere iwayo muri basketball, BAL igiye gukinwa ku nshuro yayo ya 6.
RSSB Tigers yahagurutse i Kigali kuri uyu wa gatatu tariki 24 Werurwe 2026 yerekeza i Pretoria muri Afurika y’Epfo aho yitabiriye imikino yo mu itsinda rya Kalahari.
Mu butumwa Ambasaderi Hategeka yahaye ikipe ya RSSB Tigers yayisabye kwitwara neza kurusha APR BBC yarangirije ku mwanya wa gatatu muri BAL y’umwaka ushize, yababwiye ko yizeye ko biteguye neza ndetse ko yabonye bameze neza mu myitozo ndetse yabijeje ko abanyarwanda bari muri Afurika y’Epfo bazabashyigikira ntakabuza.
Ambasaderi Hategeka siwe muyobozi wa mbere usuye ikipe ya RSSB Tigers kuko na mbere y’uko ihaguruka i Kigali yabanje gusurwa na Minisitiri wa Siporo mu Rwanda, Nelly Mukazayire.
RSSB Tigers iratangira urugendo rwayo rwo muri BAL 2026 kuri uyu wa gatanu tariki 27 Werurwe 2026 muri SunBet Arena ikina na Al Ahly Ly yo muri Libya saa 16:00 z’umugoroba.
RSSB Tigers izakina umukino wayo wa kabiri na Petro de Luanda yo muri Angola ku Cyumweru tariki 29 Werurwe 2026 saa 15:00 z’umugoroba.
RSSB Tigers izakina umukino wa gatatu tariki 1 Mata 2026 ikina na Johannesburg Giants yo muri Afurika y’Epfo saa 19:00 z’umugoroba, ikine umukino wa kane na Dar City BBC yo muri Tanzania tariki 4 Mata 2026 saa 15:00 hanyuma isoze imikino yayo y’amatsinda ikina na Nairobi City Thunder yo muri Kenya ku wa 5 Mata 2026 saa 15:00 z’umugoroba.