Amakipe ya Gisagara VC na Kepler VC zahabwaga amahirwe yo gutsinda zatsinzwe ku mukino wa mbere w’imikino ya kamarampaka (Playoffs) ya volleyball mu kiciro cy’abagabo.
Kuri uyu wa gatandatu tariki 14 Werurwe 2026 muri Petit Stade i Remera habereye imikino ibiri ya 1/2 ya kamarampaka.
Umukino wa mbere wahuje Gisagara VC yarangije Shampiyona ari iya mbere na Police VC yarangije Shampiyona ari iya kane naho umukino wa kabiri uhuza Kepler VC yarangije Shampiyona ari iya kabiri na REG VC yarangije Shampiyona ari iya gatatu.
Umukino wa mbere watangiye saa kumi n’imwe z’umugoroba wahuje Gisagara VC na Police VC warangiye ikipe ya Police yitwaye neza itsinda Gisagara amaseti 3-1 biyiha (27-25, 25-19, 26-28, 25-16) n’ubwo ikipe ya Gisagara yari yaje muri uyu mukino ariyo ihabwa amahirwe yo gutsinda.
Gisagara yahabwaga amahirwe kuko ariyo kipe yarangije Shampiyona ari iya mbere ndetse mu mikino 4 yaherukaga guhuza aya makipe yombi muri uyu mwaka w’imikino yari yararangiye Gisagara itsinzemo imikino 3, Police itsindamo umukino umwe gusa.
Nyuma y’uyu mukino hakurikiyeho umukino wahuje Kepler VC na REG VC, muri uyu mukino Kepler niyo yahabwaga amahirwe yo gutsinda cyane ko yarangirije imbere ya REG ku rutonde rwa Shampiyona ndetse yatsinze imikino 2 mu mikino 3 yaherukaga guhuza aya makipe muri uyu mwaka w’imikino.
Inshuro yonyine REG yari yaratsinze Kepler muri uyu mwaka w’imikino ni mu mukino wa 1/2 mu irushanwa ryo kwibuka Padiri Kayumba Emmanuel, muri iri rushanwa Kepler ntabwo yarifite benshi mu bakinnyi bayo basanzwe ari inkingi za mwamba barimo Dusenge Wicklif, Santiago Jair n’abandi.
Umukino watangiye Kepler yitwara neza itwara iseti ya mbere ku manota 25-21 ariko REG nayo ihita itwara iseti ya kabiri ku manota 25-14.
Kepler y’umutoza Jean Patrice Ndaki Mboulet wanatoje REG yatwaye iseti ya gatatu ku manota 25-23 ariko REG irongera ituruka inyuma itwara iseti ya kane ku manota 25-21.
Mu iseti ya gatanu Kepler niyo yatangiye iyoboye umukino ndetse itwara agace ka mbere kayo ariko birangira REG iyifashe ndetse irayitwara ku manota 15-13 nyuma yo kugorwa na resebusiyo (Receptions) kw’abakinnyi ba Kepler.
Muri rusange Police na REG zatsinze umukino wa mbere ariko urugendo ruracyari rurerure kuko hagombwa gukinwa imikino 5 hanyuma amakipe akazatanguranwa gutsinda imikino 3.
Umukino wa kabiri uzakinwa ku wa kabiri tariki 17 Werurwe 2026.