Umukinnyi w’Umunyamerika Bam Adebayo ukinira Miami Heat yo muri Shampiyona ya basketball yo muri Leta Zunze Ubumwe z’Amerika, NBA, yatsinze amanota 83 mu mukino umwe bimugira umukinnyi wa kabiri mu mateka ya NBA utsinze amanota menshi mu mukino umwe.
Ibi Edrice Femi Adebayo uzwi nka Bam Adebayo yabikoze mu mukino ikipe ya Miami Heat akinira yatsinzemo Washington Wizards amanota 150-129 mu rukerera rwo kuri uyu wa gatatu tariki 11 Werurwe 2026 ku isaha y’i Kigali.
Nyuma yo gutsinda amanota 83 mu mukino umwe, Adebayo yahise aba umukinnyi wa kabiri utsinze amanota menshi mu mukino umwe mu mateka ya NBA nyuma ya Wilt Chamberlain watsinze amanota 100 mu 1962.
Adebayo yakuye kuri uyu mwanya wa kabiri Kobe Bryant watsinze amanota 81 mu mukino umwe muri 2006, aba bakinnyi batatu akaba aribo bonyine mu mateka ya NBA bamaze gutsinda amanota ari hejuru ya 80 mu mukino umwe.
Undi mukino Adebayo w’imyaka 28 yarasanzwe yaratsinzemo amanota menshi ni 41 mbere y’uko aca aka gahigo.
Agahigo k’umukinnyi wari waratsinze amanota menshi mu mukino umwe muri NBA muri uyu mwaka w’imikino kari gafitwe na Nikola Jokic ukinira Denver Nuggets watsinze amanota 56 ubwo ikipe ye yahuraga na Minnesota Timberwolves.