Kuri uyu wa gatanu tariki 6 Werurwe 2026 hasojwe imikino yo kwishyura mu Gikombe cy’Amahoro yasize hamenyekanye amakipe azakina imikino ya 1/4 cy’irangiza ndetse azi n’uko azahura.
Umukino w’uyu munsi wabereye kuri Kigali Pele Stadium warangiye Police FC itsinze Gicumbi FC ibitego 3-1 ihita iyisezerera ku giteranyo cy’ibitego 4-2 kuko umukino ubanza wari warangiye amakipe yombi anganyije igitego 1-1.
Ibitego bya Police FC byatsinzwe na Ekeson Okerie ku munota wa 35, Msanga Henry ku munota wa 39 na Byiringiro Lague watsinze igitego mu minota y’inyongera y’umukino ubwo hari harenzeho iminota 8.
Igitego kimwe rukumbi cya Gicumbi FC cyatsinzwe na Bitwayiki Bahati Clement ku munota wa 4 w’inyongera ndetse iyi kipe yari yanabonye ikarita y’umutuku yahawe Masiri Luendo Claude ku munota wa 81 w’umukino.
Imikino yo kwishyura mu Gikombe cy’Amahoro yari yatangiye ku wa kabiri tariki 3 Werurwe 2026 aho Gasogi United yatsinze Musanze FC ibitego 2-1, ihita iyisezerera ku giteranyo cy’ibitego 3-2.
Ku wa gatatu hakinwe imikino 4, AS Kigali yanganyije na Marine FC igitego 1-1 bituma AS Kigali ihita ikomeza kubera ibitego 2 yatsindiye i Rubavu mu mukino ubanza kuko aya makipe yombi yahise anganya igitego cy’ibitego 3-3, APR FC yanganyije na Kiyovu Sports 0-0 bituma APR FC ikomeza ku giteranyo cy’ibitego 2-0.
Mukura VS&L yatsindiwe mu rugo na Etincelle FC ibitego 3-2 bituma amakipe yombi anganya ibitego 4-4 ariko Etincelle FC ihita ikomeza kubera igitego cyo hanze (Yatsindiye ibitego byinshi hanze). Amagaju FC yanganyije na Bugesera FC ibitego 2-2 bituma Bugesera FC ikomeza ku giteranyo cy’ibitego 4-3.
Imikino yakomeje ku wa kane hakinwa imikino 2. Gorilla FC yanyagiye Muhazi United yo mu kiciro cya kabiri ibitego 6-0 ihita ikomeza ku giteranyo cy’ibitego 6-0 naho Rayon Sports inyagira City Boys yo mu kiciro cya kabiri ibitego 9-0 ihita ikomeza ku giteranyo cy’ibitego 11-0.
Nyuma y’uko amakipe 8 yerekeza muri 1/4 amenyekanye yahise amenya n’uko azahura: Police FC izahura na Rayon Sports, Gasogi United izahura na APR FC, AS Kigali izahura na Gorilla FC naho Bugesera FC ihure na Etincelle FC.
Ikipe izava hagati ya Rayon Sports na Police FC izahura n’ikipe izava hagati ya Etincelle FC na Bugesera FC muri 1/2 naho ikipe izava hagati Gasogi United na APR FC izahure n’ikipe izava hagati ya AS Kigali na Gorilla FC.