Ikipe ya UGB, REG BBC na Patriots BBC zabonye intsinzi ku munsi wa 11 wa Shampiyona ya Basketball mu bagabo mu mikino yabereye muri Petit Stade i Remera.
Umukino wabimburiye indi wahuje AZOMCO na UGB, uyu mukino warangiye UGB itsinze AZOMCO amanota 87-75 nyuma yo kuba nziza mu gutsinda amanota 3 no mu kubyaza umusaruro amakosa yakorerwaga (Free throws made).
UGB yatsinze amanota 3 inshuro 7 mu gihe AZOMCO yayatsinze inshuro 2.
Amotoe James Kofi yongeye gufasha UGB kwitwara neza atsinda amanota 21 ndetse atanga n’imipira 6 yavuyemo amanota muri uyu mukino.
Umukino wakurikiyeho wahuje EAUR BBC na REG BBC warangiye REG BBC itsinze uyu mukino amanota 93-76.
Uyu mukino warugoye cyane ndetse amakipe yagendanye cyane mu manota ariko REG BBC irusha EAUR BBC izabukuru kuko yayoboye umukino hakiri kare mbere y’igice cya mbere biyiha no kurangiza umukino ikiyoboye.
Igice cya mbere cy’umukino cyarangiye REG BBC iyoboye umukino n’amanota 45-37 nyuma yo gutsinda agace ka mbere ku manota 20-19 no gutsinda agace ka kabiri ku manota 25-18.
Iki kinyuranyo REG yashyizemo mu gice cya mbere n’icyo cyakomeje kuba itandukaniro kugeza umukino urangiye iwutsinze ku manota 93-76.
Kamdoh Betoudji Frank niwe watsindiye REG amanota menshi muri uyu mukino, yayitsindiye amanota 22, atanga imipira 3 yavuyemo amanota, akora rebounds 13 muri uyu mukino.
Umukino warutegerejwe na benshi wo kuri uyu mugoroba ni umukino wahuje Kepler BBC na Patriots BBC. Uyu mukino warangiye Patriots itsinze amanota 65-61.
Patriots yabaye nziza mu kugarira muri uyu mukino aho yakoze ibihomo (Blocks) 6 muri uyu mukino naho Kepler ikora ibihomo 3, Kepler yibye umupira (Steals) inshuro 11 naho Patriots yiba umupira inshuro 14, Patriots yakoze rebounds zo kugarira 32 naho Kepler ikora 29.
Mu yindi mibare y’umukino aya makipe yombi yegeranye ariko ubwugarizi bwiza bwa Patriots butanga itandukaniro.
Damaria Franklin yafashije Patriots BBC kwitwara neza muri uyu mukino ayitsindira amanota 21, atanga imipira 6 yavuyemo amanota, yiba umupira (Steals) inshuro 3 ndetse akora rebounds 9.
Nyuma y’imikino yo kuri uyu wa gatatu, UGB na REG BBC zahise zifata umwanya wa kabiri n’uwa gatatu zica kuri APR BBC yasigaye ari iya kane, Patriots BBC na Kepler BBC zica kuri EAUR BB zifata umwanya wa gatanu n’uwa gatandatu naho EAUR ijya ku mwanya wa 7 imbere ya AZOMCO na Inspired Generation itaratsinda umukino n’umwe kugeza ubu.
Imikino ya Shampiyona izakomeza ku Cyumweru tariki 8 Werurwe 2026 hakinwa imikino 3 iteganyijwe kubera muri BK Arena:
RSSB Tigers BB 15:00 UGB
Kepler BBC 17:30 REG BBC
APR BBC 20:00 Patriots BBC