Ikipe ya Rayon Sports yanganyije na Al Hilal SC igitego 1-1 mu mukino w’ikirarane w’umunsi wa 18 wakinwe kuri uyu wa gatatu tariki 25 Gashyantare 2026 kuri Kigali Pele Stadium.
Rayon Sports yakiriye Al Hilal mu gihe yarimeze neza kuko yaherukaga no gutsinda Mukura VS&L ndetse ikaba yarimaze imikino 3 ya Shampiyona itsinda muri rusange. Umukino watangiye saa 15:30.
Al Hilal yari yabanjemo abakinnyi bayo beza bose yabanje Rayon Sports igitego hakiri kare ku munota wa 3 w’umukino cyatsinzwe na Omer Taha. Ibi byatumye abafana ba Rayon Sports bahinda umushyitsi kuko umukino ubanza wari warangiye iyi kipe yo muri Sudan itsinze ibitego 4-0.
Igice cya mbere cy’umukino cyarangiye n’ubundi Al Hilal iyoboye n’igitego 1-0 ndetse iri gukina neza kurusha Rayon Sports.
Al Hilal yatakaga izamu inyuze ku ruhande rw’ibumoso rwakinagaho umurundi Girumugisha Jean Claude wagoye cyane Uwumukiza Obed.
Mu gice cya kabiri cy’umukino, Rayon Sports yatangiye nayo kunyuzamo ikataka izamu rya Al Hilal ishaka uburyo bwo kwishyura igitego yari yatsinzwe.
Rayon Sports yakomeje gukina neza ndetse ikabona uburyo bwo kubona igitego ariko ntibubyaze umusaruro gusa bigeze ku munota wa 77, Ndayishimiye Richard wari winjiye mu kibuga asimbuye yazamuye umupira neza mu mitwe, igitutu gituma myugariro Mohamed Ahmed yitsinda igitego.
Nyuma y’uko Rayon Sports yishyuye yakomeje kwataka izamu rya Al Hilal ndetse ibona ubundi buryo bwashoboraga kuyihesha intsinzi burimo ubwageragejwe na Aziz Bassane wasigaranye n’umuzamu ariko ananirwa kunyeganyeza inshundura.
Aziz Bassane wari wabanje kugorwa n’umukino yaje no kubona ikarita itukura mu minota y’inyongera nyuma yo gukinira nabi umukinnyi wa Al Hilal bakamuha ikarita ya kabiri y’umuhondo, bivuze ko atazakina umukino w’umunsi wa 22 Rayon Sports izakirwamo na Musanze FC ku wa gatandatu tariki 28 Gashyantare kuri Sitade Ubworoherane.
Nyuma yo kunganya uyu mukino, Rayon Sports yagumye ku mwanya wa 5 muri Shampiyona n’amanota 36 inganya na Police FC iri ku mwanya wa 4 nayo yanganyije na Rutsiro FC kuri uyu wa gatatu 0-0. Izi kipe zombi zirushwa na APR FC ya gatatu amanota 3 gusa.
Al Hilal yagumye ku mwanya wa mbere n’amanota 42, ikarusha Al-Merreikh ya kabiri amanota 2.
