Ikipe ya Manchester United yatangaje ko izatandukana na Casemiro ukina mu kibuga hagati mu mpeshyi y’uyu mwaka ubwo amasezerano ye azaba arangiye.
Umunya-Brazil Casemiro w’imyaka 33 yageze muri Manchester United muri 2022 avuye muri Real Madrid atanzweho miliyoni £70.
Casemiro uhembwa ibihumbi £375 ku cyumweru muri Manchester United avuga kuri uyu mwanzuro ko atazongera amasezerano muri iyi kipe yagize ati,”Nzahorana Manchester United mu buzima bwange bwose. Uyu si wo mwanya wo kubasezeraho kuko haracyari byinshi byo gukora muri aya mezi ane agiye kuza.
Turacyafite byinshi byo guharanira, intego yange iracyari yayindi nk’ibisanzwe, ni ugukomeza gutanga ibyo nshoboye kugira ngo mfashe ikipe gutsinda.”
Mu bakinnyi bivugwa ko bashobora kwinjira muri Manchester United gusimbura Casemiro barimo Elliott Anderson ukinira Nottingham Forest, Carlos Baleba ukinira Brighton & Hove Albion na Adam Wharton ukinira Crystal Palace.
Kuva Carlos Henrique Casimiro uzwi nka Casemiro yagera muri Manchester United amaze kuyikinira imikino 146, yayitsindiye ibitego 21, atanga imipira 13 yavuyemo ibitego, atwarana nayo ibikombe bibiri birimo FA Cup na Carabao Cup.