APR FC yatsinze Rayon Sports ibitego 4-1 ku mukino w’Igikombe Kiruta Ibindi mu Rwanda, iba inshuro ya gatatu yikurikiranya iyitsinda.
Kuri uyu wa gatandatu tariki 10 Mutarama 2025 habaye umukino w’Igikombe Kiruta Ibindi mu Rwanda mu bagabo gitegurwa n’Ishyirahamwe ry’Umupira w’Amaguru mu Rwanda, FERWAFA Super Cup 2025.
Umukino watangiye saa 18:30 kuri Sitade Amahoro nyuma y’umukino wa FERWAFA Women Super Cup Rayon Sports y’abagore yatsinzemo Indahangarwa WFC ibitego 4-0.
Uyu mukino uhuza ikipe yatwaye igikombe cya Shampiyona n’ikipe yatwaye igikombe cy’Amahoro.
Bitewe n’uko APR FC yatwaye ibi bikombe byombi mu mwaka ushize w’imikino byasabye ko Rayon Sports yageze ku mukino wa nyuma w’Igikombe cy’Amahoro ndetse ikaba iya kabiri muri Shampiyona ariyo ikipe na APR FC ku mukino wa nyuma wa FERWAFA Super Cup 2025.
Umutoza wa APR FC Taleb Abderrahim yabanjemo abakinnyi 11 basanzwe babanzamo barimo umuzamu Ishimwe Pierre, Byiringiro Jean Gilbert, Niyigena Clément, Nshimiyimana Yunussu, kapiteni Niyomugabo Claude, Ronald Ssekiganda, Seidu Dauda Yussif, Raouf Memel Dao, Mugisha Gilbert, Djibril Outtara na William Togui.
Ku ruhande rw’umutoza mushya wa Rayon Sports Bruno Ferry yabanje mu kibuga abakinnyi batandatu (6) bose iyi kipe iherutse gusinyisha mu isoko ry’igura n’igurisha ry’abakinnyi ryo muri uku kwezi kwa mbere barimo umuzamu Kwizera Olivier, ba myugariro Yannick Bangala Litombo, Ben Aziz Dao na Ramazani Tshimanga Tshilembi, umukinnyi wo mu kibuga hagati Faustin Likau Kitoko na rutahizamu Bienvenue Joachim Vigninou.
Abandi bakinnyi babanje mu kibuga ku ruhande rwa Rayon Sports basanzwe muri iyi kipe barimo kapiteni Serumogo Ali, Ndayishimiye Richard, Sindi Paul Jesus, Tony Kitoga na Ndikumana Asman.
Rayon Sports niyo yatangije umupira, yatangiye iwuhererekanya neza ariko igakinira cyane mu kibuga cyayo, kwambukiranya ikibuga byari ingorabahizi.
APR FC yakinaga ihanahana umupira neza ariko yihuta ndetse igakinira cyane mu gice cya Rayon Sports ari nako igerageza gusatira izamu, yakinaga bigaragara ko ari ikipe imenyeranye kurusha Rayon Sports.
Uku gusatira izamu kwafashije ikipe ya APR FC kubona ibitego bibiri mu gice cya mbere birimo igitego cya William Togui cyo ku munota wa 19 cyabonetse nyuma y’amakosa y’umuzamu Kwizera Olivier wafashe umupira ariko akananirwa kuwukomeza n’igitego cya Ronald Ssekiganda cyo ku munota wa 42 cyabonetse giturutse ku burangare bw’abakinnyi ba Rayon Sports bahagaze nabi mu gihe cya koruneri.
Rayon Sports yarangije igice cya mbere cy’umukino ntamupita iteye ugana mu izamu rya Ishimwe Pierre wa APR FC.
Mu gice cya kabiri cy’umukino Rayon Sports yagerageje kwishyura ibitego yari yatsinzwe nu gice cya mbere ariko APR FC iyibera ibamba n’ubwo yari yagabanyije gusatira cyane.
Ku munota wa 70 w’umukino, umuzamu wa Rayon Sports yateye umupira imbere ashaka abakinnyi be ariko wifatirwa n’abakinnyi ba APR FC babanza kuwuhererekanya kugeza ugeze kuri Seidu Dauda Yussif wahise afata icyemezo ava mu kibuga hagati acenga arinda atsinda igitego cya gatatu cya APR FC.
Rayon Sports yarifite iminota 20 yo gushaka uko yishyura ibitego 3 yarimaze gutsindwa yatangiye gusatira izamu rya APR FC ariko umuzamu Ishimwe Pierre ayibera ibamba, akuramo imipira itandukanye yashoboraga kuvamo ibitego harimo nka kufura yatewe neza na Ndayishimiye Richard n’ishoti rya kure rya Tony Kitoga.
Mu minota y’inyongera ubwo hari harenzeho iminota 3, Rayon Sports yabonye igitego cy’impozamarira cyatsinzwe na Ndikumana Asman ndetse benshi mu bakurikiraga uyu mukino bibwira ko umukino uri burangire uko.
Si uko byagenze kuko APR FC yaje kubona igitego cya 4 ku munota wa gatanu w’inyongera gitsinzwe na Mamadou Sy wari winjiye asimbuye ku mupira yarahawe na Ruboneka Jean Bosco warumaze gucenga no kwandagaza umuzamu Kwizera Olivier.
Uyu mukino wasifuwe na Nsabimana Celestin warangiye APR FC itsinze Rayon Sports ibitego 4-1 ndetse ihita yegukana igikombe cya FERWAFA Super Cup 2025.
Ni ku nshuro ya gatatu yikurikiranya APR FC yaritsinze Rayon Sports mu marushanwa yose ni mu gihe Rayon Sports iheruka gutsinda APR FC muri Kanama 2023, icyo gihe yayitsinze ibitego 3-0 ku mukino wa FERWAFA Super Cup.
APR FC yabaye iya mbere yahembwe miliyoni 20 z’amafaranga y’u Rwanda naho Rayon Sports ihembwa miliyoni 10 z’amafaranga y’u Rwanda.