Kuri iki cyumweru tariki 28 Ukuboza 2025 habaye ibirori byabereye i Dubai muri Emirati Zunze Ubumwe z’Abarabu byo gutanga ibihembo bya Globe Soccer Awards 2025 bitegurwa na Dubai Sports Council kuva muri 2010.
Ibi bikaba ari ibihembo byatangwaga ku nshuro ya 16 bihabwa abakinnyi, abatoza n’abayobozi bahize abandi mu mwaka w’imikino uba urangiye.
Ibirori byatangiye hatangwa ibihembo byerekeranye na Shampiyona ya Espagne, La Liga nk’uko impande zombi (La Liga na Globe Soccer Awards) baherutse gusinyana amasezerano yemeza ubufatanye, aho abitwaye neza muri La Liga bahembwa mu birori byo gutanga ibi bihembo.
Ibihembo byo muri La Liga byihariwe na FC Barcelona yatwaye igikombe cya Shampiyona aho iyi kipe yahembwe nk’ikipe nziza y’umwaka, umutoza wayo Hansi Flick ahembwa nk’umutoza mwiza w’umwaka.
Umuzamu wa Atletico Madrid Jan Oblak yahembwe nk’umuzamu mwiza w’umwaka, Raphinha ahembwa nk’umukinnyi mwiza w’umwaka muri La Liga abikesha ibitego 18 yatsinze n’imipira 11 yatanze yavuyemo ibitego naho Lamine Yamal ahembwa nk’umukinnyi mwiza mu batarengeje imyaka 23.
Mu bindi bihembo byatanzwe muri rusange, igihembo nyamukuru cy’umukinnyi mwiza w’umwaka cyegukanwe na Ousmane Dembélé ukinira Paris Saint Germain ahigitse abarimo Kylian Mbappé, Raphinha, Vitinha na Lamine Yamal bari bagihanganiye naho mu bagore cyegukanwe na Aitana Bonmatí usanzwe ukinira Barcelona.
Cristiano Ronaldo wa Al Nassr yegukanye igihembo cy’umukinnyi mwiza w’umwaka wo mu Burasirazuba bwo Hagati (Mu bihugu by’Abarabu) ku nshuro ya kabiri yikurikiranya ndetse ahita yemeza ko intego ye ari ukugeza ibitego 1,000 akaba uwa mbere waba ubikoze mu mateka y’umupira w’amaguru. Ronaldo w’imyaka 40, kuri ubu amaze kugeza ibitego 956.
Ikipe y’umwaka mu bagabo yabaye Paris Saint Germain yo mu Bufaransa naho ikipe y’umwaka mu bagore yabaye Barcelona yo muri Espagne. Ikipe y’igihugu y’umwaka mu bagabo yabaye Portugal.
Umutoza w’umwaka yabaye Luis Enrique wa PSG, umukinnyi wo mu kibuga hagati mwiza w’umwaka aba Vitinha wa PSG, rutahizamu mwiza w’umwaka yabaye Lamine Yamal wa Barcelona, umukinnyi mwiza ukizamuka (Emerging Player) yabaye Désiré Doué wa PSG naho Paul Pogba ahabwa igihembo cy’umukinnyi wagarutse (Best Comeback) nyuma yo kumara imyaka ibiri n’amezi 4 adakina.
Jorge Mendes yabaye ureberera inyungu z’abakinnyi mwiza w’umwaka (Agent), umuyobozi mwiza w’umwaka mu bya siporo (Best Sporting Director) aba Luis Campos wa PSG, Perezida w’ikipe mwiza w’umwaka yabaye Nasser Al-Khelaïfi wa PSG, Content Creator w’umwaka yabaye Bilal Halal, naho irerero ryiza riba Right to Dream ryo muri Ghana.
Umuyapani Hidetoshi Nakata na Andrés Iniesta bahembwe nk’abageze kuri byinshi mu mupira w’amaguru (Career Achievement Award), ikipe yiyerekanye neza y’umwaka (Best Branding) yabaye Los Angeles FC yo muri Leta Zunze Ubumwe z’Amerika, umutoza mwiza w’umwaka wo mu mutwe (Best Mental Coach) yabaye Nicoletta Romanazzi.
Nyakwigendera Diogo Jota wakiniraga Liverpool n’ikipe y’igihugu ya Portugal yahawe igihembo cyihariye cyashyikirijwe ababyeyi be.
Umukinnyi wa tennis, Novak Djokovic yahawe igihembo cyatangwaga ku nshuro ya mbere gihabwa umukinnyi wageze kuri byinshi mu mikino yose muri rusange (Lifetime Athletic Achievements), iki gihembo yagishyikirihwe na Cristiano Ronaldo.