Kizigenza Cristiano Ronaldo yatsinze igitego cyavugishije benshi kizwi nka “Bicycle kick” mu mukino ikipe abereye kapiteni ya Al Nassr yatsinzemo Al-Khaleej ibitego 4-1 mu mukino w’umunsi wa 9 wa Shampiyona ya Arabie Saoudite wabaye kuri iki cyumweru tariki 23 Ugushyingo 2025.
Ronaldo yatsinze iki gitego cyavugishije benshi ku munota wa 90 ubwo hari harenzeho iminota 6 nyuma y’umupira waruzamuwe neza na Nawaf Bu Washl.
Iki gitego kibukije benshi igitego kijya kumera kimwe nacyo yatsinze ikipe ya Juventus muri 2017 muri UEFA Champions League ubwo yakiniraga Real Madrid.
Ronaldo w’imyaka 40 ukiruka ku gahigo ko kuba umukinnyi wa mbere mu mateka y’umupira w’amaguru wuzuza ibitego 1,000 yujuje igitego cya 954.
Ibindi bitego bya Al Nassr byari byatsinzwe na Joao Felix ku munota wa 39, Wesley ku munota wa 42 na Sadio Mane ku munota wa 77.
Al Nassr imaze gutsinda imikino 9 yose ya shampiyona, ikaba iyoboye n’amanota 27, yizigamye ibitego 25.