Ku mugoroba wo kuri uyu wa kabiri tariki 18 Ugushyingo 2025 ikipe ya Rayon Sports yatangaje ko yamaze gutandukana n’umukinnyi Mohamed Chelly ku bwumvikane bw’impande zombi.
Tariki 3 Nyakanga 2025 nibwo umunya-Tunisia Mohamed Chelly ukina mu kibuga hagati yataka yatangajwe nk’umukinnyi mushya w’ikipe ya Rayon Sports.
Chelly w’imyaka 24 y’amavuko yasinyiye Rayon Sports amasezerano y’umwaka umwe avuye mu ikipe ya Océano Club de Kerkennah yaramazemo imyaka 3.
Chelly yatandukanye na Rayon Sports ku bwumvikane busesuye nk’uko iyi kipe izwi ku mabara y’uburu n’umweru yabitangaje.
Mohamed Chelly ntabwo yaragikoreshwa cyane ndetse atandukanye na Rayon Sports ayitsindiye igitego 1, iki gitego yagitsinze mu mukino wa gacitu wabereye i Nyanza Rayon Sports yatsinzemo Gasogi United ibitego 2-0 wanatangiye Rayon Week wabaye tariki 1 Kanama 2025.
Mohamed Chelly atandukanye na Rayon Sports nyuma y’uko abatoza bazanye nawe b’abanya-Tunisia Afhamia Lotfi n’umwungiriza we wari uwa kabiri Azouz Lotfi nabo batandukanye n’iyi kipe.