Ikipe ya Atalanta yo mu Butaliyani yirukanye umutoza w’umunya-Croatia Ivan Juric wayitozaga azira kugira umusaruro mubi.
Kuri uyu wa mbere tariki 10 Ugushyingo 2025 ikipe ya Atalanta yatangaje ko yamaze gutandukana n’umutoza Ivan Juric nyuma yo gutsindirwa na Sassuolo mu rugo mu mpera z’icyumweru gishize ibitego 3-0.
Ivan Juric w’imyaka 50 yageze muri Atalanta muri Kamena uyu mwaka asimbuye Gian Piero Gasperini waruhamaze imyaka 9.
Kuva Ivan Juric yagera muri Atalanta yatsinze imikino 2 gusa ya Shampiyona, anganya imikino 7, atsindwa imikino 2, nyuma y’imikino 11 ya Shampiyona y’Ubutaliyani, Serie A, Atalanta iri ku mwanya wa 13 n’amanota 13.
Uretse kuba ikipe itariri kwitwara neza mu kibuga, havugwaga n’umwuka mubi mu rwambariro rw’iyi kipe hagati y’umutoza n’abakinnyi be by’umwihariko umunya-Nigeria Ademola Lookman wagaragaje kutishimira gusimburwa kwe mu mukino wa UEFA Champions League wabaye icyumweru gishize bakina na Marseille yo mu Bufaransa.
Ivan Juric yirukanywe na Atalanta nyuma y’uko n’umwaka ushize w’imikino yamanuye ikipe ya Southampton yo mu Bwongereza nyuma yo gutsinda umukino umwe mu mikino 14 yayitoje.
Amakuru aturuka mu Butaliyani aravuga ko umutoza Raffaele Palladino ariwe uhabwa amahirwe menshi yo kuba umutoza mushya wa Atalanta.