Neymar Jr yavugirijwe induru n’abafana ba Santos akinira nyuma yo gusohoka mu kibuga asimbujwe mu gihe ikipe ye yari yatsinzwe ibitego 3-0 mu mukino wa Shampiyona ya Brazil bamushinja umusaruro mucye aha iyi kipe.
Mu rukerera rwo kuri uyu wa mbere tariki 10 Ugushyingo ku isaha y’i Kigali Flamengo yari yakiriye Santos mu mukino w’umunsi wa 32 wa Shampiyona ya Brazil kuri Sitade Maracana.
Flamengo yatangiye neza itsinda ibitego 3-0 kugeza ku munota wa 85 ubwo Neymar yasimbuzwaga n’umutoza Juan Pablo Vojvoda.
Neymar agisimbuzwa yagaragaje kutabyishimira gusa abafana ba Santos nabo ntibahwemye kumukomera (Kumuvugiriza induru) bamutuka dore ko iyi kipe iri mu mazi abira yo kumanuka mu kiciro cya kabiri.
Santos yagerageje kwishyura ibitego 3 yari yatsinzwe ariko ibasha kubona bibiri, umukino urangira ari ibitego 3-2 uba umukino wa 5 wikurikiranya Santos itsindwa.
Mu magambo y’uburakari abafana ba Santos bavugaga kuri Neymar bagira bati,”Wagarutse muri Santos gukina ikiciro cya kabiri.” ubundi agakurikirwa n’ibitutsi byinshi cyane.
Kugeza ubu Santos iri ku mwanya wa 17 mu makipe 20, ifite amanota 33 mu mikino 32 n’umwenda w’ibitego 15 mu gihe habura imikino 6 gusa ngo Shampiyona ya Brazil ishyirweho akadomo.
Santos irarusha Juventude ya 18 inota rimwe, ikarusha Fortaleza ya 19 amanota 3 hanyuma ikarushwa na Vitoria ya 16 amanota 2 mu gihe irushwa na Internacional ya 15 amanota 4.
Neymar w’imyaka 33 yasubiye muri Santos uyu mwaka avuye muri Al Hilal yo muri Arabie Saoudite nyuma yo kuyikinira muri 2009 kugeza muri 2013 ubwo yagurwaga na FC Barcelona ari naho yubakiye ibigwi.
Kuva Neymar yagera muri Santos amaze kuyikinira imikino 23, yayitsindiye ibitego 6, atanga imipira 3 yavuyemo ibitego. Mu mikino Neymar yakinnye, Santos yatsinze imikino 9, inganya imikino 6, itsindwa imikino 8.