Amakipe yo mu Rwanda y’abagore ya basketball ya REG na APR yatangiye yitwara neza mu mikino yo gushaka itike y’igikombe cy’Afurika, FIBA Women Basketbal League Africa yo mu karere ka 5 iri kubera muri Kenya muri Nyayo National Stadium.
REG WBBC yakinnye umukino wayo wa mbere kuri iki Cyumweru tariki 9 Ugushyingo ikina na Don Bosco Lady Lioness yo muri Tanzania.
Uyu mukino warangiye REG itsinze amanota 87-38 nyuma yo kwitwara neza kwa Kristina King watsinze amanota 15, akora rebounds 9 ndetse atanga imipira 4 yavuyemo amanota.
APR WBBC yakinnye umukino wayo wa mbere kuri uyu wa mbere tariki 10 Ugushyingo 2025 ikina na Gladiators yo mu Burundi.
Umukino warangiye APR yitwaye neza itsinda Gladiators amanota 97-42 nyuma yo kubifashwamo n’umunya-Senegal Yacine Diop watsinze amanota 15, akora rebounds 5 ndetse atanga imipira 5 yavuyemo amanota.
Mu mpera z’icyumweru gishize nibwo amakipe ya REG na APR zahagurutse i Kigali zerekeza i Nairobi muri Kenya gukina imikino yo gushaka itike ya Basketbal League Africa mu bagore yatangiye kuri iki cyumweru tariki 9 Ugushyingo 2025.
Amakipe 9 niyo yitabiriye iyi mikino yo mu karere ka gatanu, aya makipe yagabanyijwe mu matsinda 2, itsinda rimwe ririmo amakipe 5 naho irindi ririmo amakipe 4.
Mu itsinda rya mbere (A) ririmo amakipe 5 niho APR yisanze iri kumwe na Kenya Ports Authority (KPA) yo muri Kenya, Gladiators yo mu Burundi, Stormers yo muri Uganda na Fox yo muri Tanzania.
REG yisanze mu itsinda B ry’amakipe 4 iri kumwe na Les Hippos yo mu Burundi, Zetech University yo muri Kenya na Don Bosco yo muri Tanzania.
Nyuma yo gutangira amakipe yo mu Rwanda yitwara neza azagaruka mu kibug yombi kuri uyu wa kabiri tariki 11 Ugushyingo 2025, REG izakina na Zetech University yo muri Kenya saa 14:00 naho APR ikine na Fox yo muri Tanzania saa 16:30.