Kizigenza Cristiano Ronaldo yongeye gutakaza amahirwe yo gutwara igikombe nyuma y’uko ikipe ye ya Al-Nassr isezerewe na Al-Ittihad mu gikombe kitiriwe umwami, King’s Cup cyo muri Arabie saoudite.
Kuri uyu wa kabiri tariki 28 Ukwakira 2025 Al-Nassr ya Cristiano Ronaldo yakinnye na Al-Ittihad ya Karim Benzema muri 1/8 cya King’s Cup.
N’ubwo Al-Ittihad yaje kubona ikarita y’umutuku ku munota wa 49 yahawe Ahmed Al-Julaydan ukina nka myugariro ntibyayibujije gutsinda Al-Nassr ibitego 2-1 byose byabonetse mu gice cya mbere.
Karim Benzema niwe wafunguye amazamu ku munota wa 15, Ângelo yishyura igitego ku munota 30, Houssem Aouar aza gushyiramo igitego cya kabiri cya Al-Ittihad mu minota y’inyongera y’igice cya mbere kirangira gutyo.
Mu gice cya kabiri Al-Nassr yagikinnye hafi ya cyose na Al-Ittihad y’abakinnyi 10 ariko kubona igitego cyo kwishyura biba iyanga umukino urangira itsinzwe ibitego 2-1, Al-Nassr ihita isezererwa.
Cristiano Ronaldo kuva yagera muri Al-Nassr muri 2023 ntabwo aratwarana nayo igikombe cyemewe (Major Title), Igikombe yatwaranye n’iyi kipe ni Arab Champions Cup gifatwa nk’igikombe cy’imikino ya gicuti.
Cristiano Ronaldo w’imyaka 40 uherutse kongera amasezerano muri Al-Nassr ndetse umaze guca agahigo ko kuzuza ibitego 950 nk’umukinnyi w’umupira w’amaguru, aheruka gutwara igikombe cyemewe (Major Title) muri 2021 ubwo yari mu ikipe ya Juventus.
Al-Nassr isigaje kwiruka ku bikombe 2 muri uyu mwaka w’imikino birimo Shampiyona ya Saudi Arabia kuri ubu inayoboye n’amanota 18 mu mikino 6 imaze gukinwa ndetse na AFC Champions League Two, irushanwa rya kabiri rikomeye muri Aziya nyuma ya AFC Champions League.