Ikipe ya Nairobi United yo muri Kenya ikinamo myugariro w’umunyarwanda Buregeya Prince yageze mu matsinda ya CAF Confederation Cup ku nshuro ya mbere mu mateka yayo nyuma yo gusezerera Etoile Sportive du Sahel yo muri Tunisia kuri penaliti 7-6.
Kuri iki Cyumweru tariki 26 Ukwakira 2025 Etoile Sportive du Sahel yari yakiriye Nairobi United mu mukino wo kwishyura w’ijonjora rya kabiri muri CAF Confederation Cup.
Umukino ubanza wabaye tariki 19 Ukwakira muri Kenya kuri Nyayo Stadium wari warangiye Nairobi United itsinze ibitego 2-0, mu mukino wo kwishyura Etoile Sportive du Sahel yishyuye ibi bitego byombi maze imikino yombi irangira amakipe yombi anganya ibitego 2-2.
Hahise hiyambazwa penaliti maze umuzamu wa Nairobi United Kevin Odour abasha gukuramo penaliti 2 ndetse atsinda penaliti ya 7 yahesheje intsinzi iyi kipe kuko yatsinze penaliti 7-6, ibi byahaye Nairobi United kuba izahagararira Kenya muri CAF Confederation Cup ku nshuro yayo ya mbere mu mateka.
Nairobi United ikinamo umunyarwanda Buregeya Prince yari yasezereye NEC FC yo muri Uganda mu ijonjora rya mbere.
Buregeya Prince yagiye muri Nairobi United muri Kanama uyu mwaka avuye muri AS Kigali nayo yagezemo avuye muri APR FC.
Nairobi United yarimaze umwaka umwe mu kiciro cya mbere muri Kenya niyo kipe yonyine izaba ihagarariye Kenya mu mikino nyafurika.