Gisagara VC yatsinze EAUR VC amaseti 3-2 mu mukino wa Round ya 1 ya Shampiyona ya volleyball mu bagabo naho Police iha ikaze Kirehe VC mu kiciro cya mbere iyitsinda amaseti 3-0.
Kuri uyu wa gatandatu tariki 18 Ukwakira 2025 hakinwe imikino ibiri ya Round ya 1 ya shampiyona y’u Rwanda ya volleyball harimo umukino wahuje Police VC na Kirehe VC n’umukino wahuje EAUR VC na Gisagara VC, imikino yombi yakiniwe muri Petit Stade i Remera.
Uyu wari umunsi wa kabiri wa shampiyona ya Volleball nyuma y’uko itangiye kuri uyu wa gatanu tariki 17 Ukwakira, Kepler VC itsinda REG VC amaseti 3-0.
Police VC y’umutoza Musoni Fred yahaye ikaze Kirehe VC yarigarutse mu kiciro cya mbere nyuma y’umwaka yarimaze itagikina iyitsinda amaseti 3-0 (25-19, 25-11, 25-18).
Kirehe VC y’umutoza Serugo Christophe yiganjemo abakinnyi bavuka i Kirehe ndetse yarimaze umwaka umwe w’imikino idakina shampiyona kuko umwaka ushize akarere ka Kirehe kari kafashe umwanzuro wo kuba gasheshe iyi kipe kugira ngo ingengo yimari yayigendagaho yifashishwe mu kuzuza inzu y’imikino (Gymnase) ya Kirehe kuri ubu yamaze kuzura ndetse ikaba izakoreshwa muri Shampiyona.
Undi mukino wabaye wahuje EAUR VC y’umutoza Dusabimana Vincent uzwi nka Gasongo na Gisagara VC y’umutoza Yakan Guma Lawrence.
Uyu mukino watangiye Gisagara VC yaguze abakinnyi barimo Ndayisaba Sylvestre, Gatsinzi Venuste na Murava Ronard yitwara neza itwara amaseti abiri ya mbere ku manota 25-16 no kuri 25-9.
Benshi mu bakurikiranye uyu mukino babonaga ko Gisagara igiye gutwara amanota atatu byoroshye ariko siko byaje kugenda kuko EAUR yavuye inyuma maze itwara iseti ya gatatu ku manota 25-22 ndetse yiyongeza n’iseti ya kane ku manota 25-16 bituma hiyambazwa iseti ya gatanu ariyo ya kamarampaka.
Mu iseti ya kamarampaka nibwo Gisagara yongeye kugaruka maze iyitwara ku manota 15-12 biyiha kwegukana intsinzi n’amanota abiri kuri uyu mukino.
Mu mwaka ushize w’imikino, aya makipe n’ubundi yari yahuye ku munsi wa mbere wa shampiyona, umukino wari warangiye EAUR itsinze Gisagara amaseti 3-1.
Nyuma ya Round ya 1 y’imikino ibanza ya Shampiyona ya Volleyball mu Rwanda, Police VC niyo iyoboye n’amanota 3, inganya na Kepler ya kabiri ubundi hakaza Gisagara VC ifite amanota abiri, EAUR iri ku mwanya wa kane n’inota rimwe.
