Umunya-Slovenia Tadej Pogacar yegukanye umudari wa zahabu muri Shampiyona y’amagare yo ku mugabane w’Uburayi mu gusiganwa mu muhanda (Road Race) yasojwe tariki 5 Ukwakira 2025 yaberaga i Guilherand-Granges mu Bufaransa.
Pogacar yegukanye uyu mudari akoresheje amasaha 4, iminota 59 n’amasegonda 29 ku ntera ya kirometero 202.5, yayoboye ibirometero 75 mbere yo kwegukana intsinzi kuri iki Cyumweru.
Pogacar yakurikiwe n’Umubiligi Remco Evenepoel wakoresheje amasaha 5 (Arushwa amasegonda 31), aba bombi n’ubundi bari bahanganye i Kigali mu mpera z’ukwezi gushize muri Shampiyona y’Isi y’Amagare yabereye i Kigali kuva tariki 21 Nzeri igasozwa tariki 28 Nzeri 2025.
N’ubwo Pogacar yegukanye umudari wa zahabu mu gusiganwa mu muhanda gusa na Evenepoel yongeye kwerekana ko ari umwami mu gusiganwa n’ibihe (Individual Time Trial) nk’uko byagenze muri Shampiyona y’Isi y’Amagare yatwaye umudari wa zahabu akoresheje iminota 28 n’amasegonda 26 ku ntera ya kirometero 24, yarushije umutaliyani Filippo Ganna wabaye uwa kabiri amasegonda 43.37.
Umufaransa Paul Seixas yaje ku mwanya wa gatatu akoresheje amasaha atanu, iminota 3 n’amasegonda 10.
Shampiyona y’Amagare ku mugane w’Uburayi yakinwaga ku nshuro ya 31 mu Bufaransa mu byiciro 14 birimo ibyiciro 6 byo gusiganwa mu muhanda (6 road races), ibyiciro 6 byo gusiganwa n’ibihe (6 time trials) n’ibyiciro bibiri byo gusiganwa n’ibihe ariko mu makipe (2 relays), yakinwe kuva tariki 1 kugeza tariki 5 Ukwakira 2025.