Nyuma y’uko imikino ya Shampiyona ya volleyball ishyizweho akadomo, guhera kuri uyu wa gatandatu tariki 14 Werurwe 2026 harakinwa imikino ya kamarampaka (Playoffs) igomba kugena ikipe izatwara igikombe cya Shampiyona mu bagabo n’abagore.
Amakipe 8 ya mbere harimo 4 ya mbere yo mu bagore n’amakipe 4 ya mbere yo mu bagabo niyo azakina hagati yayo ahatanira igikombe cya Shampiyona.
Mu kiciro cy’abagabo, amakipe 4 ya mbere azakina ntiharimo ikipe ya APR VC ifite igikombe giheruka, harimo Gisagara VC, Kepler VC, REG VC na Police VC. Ikipe ya mbere izahura n’ikipe ya kane naho ikipe ya kabiri ihure n’ikipe ya gatatu ari nako bizagenda mu bagore.
Mu kiciro cy’abagore amakipe azakina ni APR WVC, Kepler WVC, Police WVC na RRA WVC.
Bitandukanye n’imyaka yabanje, kuri iyi nshuro amakipe azakina imikino 5, atanguranwe gutsinda imikino 3 mu gihe mu busanzwe yakinaga imikino 3 agatanguranwa gutsinda imikino 2.
Kuri uyu wa gatandatu muri Petit Stade i Remera nibwo imikino ya 1/2 iratangira hakinwa umukino wa mbere, saa 12:30 APR WVC irakina na RRA WVC naho saa 15:00 Kepler ikine na Police mu kiciro cy’abagore.
Mu kiciro cy’abagabo ikipe ya Gisagara VC izakina na Police VC saa 17:30 naho saa 19:00 Kepler ikine na REG VC.
Icyo imibare ivuga ku mikino ya 1/2
- Gisagara VC VS Police VC
Gisagara VC yarangirije ku mwanya wa mbere muri Shampiyona n’amanota 37, mu mikino 16 yatsinzemo imikino 13, itsindwa imikino 3 naho Police VC yarangirije Shampiyona ku mwanya wa kane n’amanota 33, mu mikino 16 ya Shampiyona yatsinzemo imikino 11, itsindwa imikino 5.
Gisagara iheruka gutwara igikombe cya Shampiyona y’u Rwanda muri 2023 ndetse ifite agahigo ko kuba ariyo kipe yo mu Rwanda yabashije gukura umudari wa bronze (Umwanya wa gatatu) mu mikino nyafurika ihuza amakipe yabaye aya mbere iwayo, uyu mudari yawukuye muri Tunisia muri 2022.
N’ubwo Gisagara VC ari ikipe y’ibigwi ariko ntiyigeze ikina imikino ya kamarampaka mu myaka ibiri ishize, ibi bivuze ko itariherutse kugera ku rwego nk’uru.
Ku rundi ruhande, ikipe ya Police ni ikipe itari nkuru muri Shampiyona kuko yatangiye kuyikina muri 2022 ubwo yitwaga Forefront VC mbere yo guhinduka Police VC. Kuva Police VC yashingwa ntirabasha kumenya uko igikombe cya Shampiyona y’u Rwanda gisa n’ubwo yagiye yenda kugikozaho imitwe y’intoki dore ko kuva yaza itarasiba na rimwe imikino ya kamarampaka.
Muri rusange aya makipe yahuye inshuro 4 kuva uyu mwaka w’imikino watangira. Imikino 4 yahuje aya makipe yombi yarangiye Gisagara itsinze imikino 3 naho Police itsinda umukino 1.
Irushanwa rya BK Arena Volleyball Cup 2025 ryarangiye Gisagara ariyo yegukanye igikombe.
Bamwe mu bakinnyi bo kwitega muri Gisagara VC y’umutoza Yakan Guma Lawrence ni umunya-Niger ukina hagati (Middle Blocker) Adamou Doudou Djibril na Niyogisubizo Samuel “Tyson” ukina inyuma (Opposite hitter/Right attacker) bafashije iyi kipe yo mu Majyepfo kwitwara neza mu mikino isanzwe ya Shampiyona.
Bamwe mu bakinnyi bo kwitega mu ikipe ya Police VC y’umutoza Musoni Fred barimo umukinnyi ukina inyuma w’umunya-Kenya Makuto Elphas ufatiye runini iyi kipe ya Polisi y’u Rwanda.
- Kepler VC VS REG VC
Kepler VC yarangirije Shampiyona ku mwanya wa kabiri n’amanota 35, mu mikino 16 yatsinzemo imikino 12, itsindwa imikino 4 naho REG VC yarangije Shampiyona ku mwanya wa 3 n’amanota 33, mu mikino 16 yatsinzemo imikino 12, itsindwa imikino 4.
REG VC niyo kipe ifite ibigwi ugereranyije na Kepler VC dore ko ari nayo kipe nkuru. REG iheruka kwegukana igikombe cya Shampiyona mu mwaka wa 2022/23 ubwo yacyegukanaga ihigitse Gisagara VC.
Kepler ni ikipe itamaze igihe muri Shampiyona y’u Rwanda dore ko yatangiye gukina Shampiyona muri 2024. N’ubwo iyi ari ikipe nshya ariko ntabwo ari ikipe y’agafu k’imvugwarimwe kuko kuva yaza ntabwo irarangiza umwaka w’imikino idatwaye igikombe ndetse ntirasiba na rimwe imikino ya kamarampaka n’ubwo itarabasha kwegukanaho igikombe cya Shampiyona.
Muri uyu mwaka w’imikino aya makipe yahuye inshuro 3, muri iyi mikino Kepler yatsinzemo imikino 2 ya Shampiyona naho REG itsinda umukino umwe aya makipe yakinnye mu irushanwa ryo kwibuka Padiri Kayumba Emmanuel ryanarangiye REG VC iryegukanye.
Bamwe mu bakinnyi bo kwitega mu ikipe ya Kepler VC y’umutoza Jean Patrice Ndaki Mboulet barimo umunya-Puerto Rico Santiago Jair wageze muri Kepler mu mikino yo kwishyura na kapiteni w’ikipe y’igihugu y’u Rwanda, Dusenge Wicklif.
Ku ruhande rwa REG VC y’umutoza Mugisha Bavuga Benon, bamwe mu bakinnyi bo kwitega muri iyi mikino barimo Gisubizo Merci uherutse no kuba umukinnyi mwiza mu irushanwa ryo kwibuka Padiri Kayumba Emmanuel na kapiteni w’iyi kipe Thon Maker Madol.
- APR WVC VS RRA WVC
APR WVC ni ikipe yarangirije imikino ya Shampiyona ku mwanya wa mbere, mu mikino 12 yatsinzemo imikino 11, itsindwa umukino umwe gusa yatsinzwemo na Kepler VC muri Shampiyona. APR WVC iheruka gutwara igikombe cya Shampiyona muri 2024 ndetse n’umwaka ushize yatsindiwe ku mukino wa nyuma na Police WVC.
RRA WVC nayo ni ikipe y’ubukombe muri volleyball y’u Rwanda n’ubwo muri iyi myaka isa n’iyasubiye hasi. Iyi kipe iheruka kwegukana igikombe cya shampiyona muri 2023, kuva icyo gihe ntirabasha no kongera kugera ku mukino wa nyuma w’imikino ya kamarampaka.
Aya makipe yombi yahuye inshuro 5 muri uyu mwaka w’imikino, iyi mikino yose yarangiye APR WVC iyitsinze.
Bamwe mu bakinnyi bo kwitega mu ikipe ya APR WVC y’umutoza Justin Kigwaria barimo Mukandayisenga Benitha n’abanya-Kenya Sylvia Asimit Lachilla ukina inyuma na Linar Ogwera Achieng ukina atanga imipira (Setter) bombi bageze muri iyi kipe mu mikino yo kwishyura.
Bamwe mu bakinnyi bo kwitega muri RRA WVC y’umutoza Mutabazi Elie barimo umunya-Nigeria Ijeoma Elisabeth, Nzamukosha Olive na Madut Abuk Wol Ngong.
- Kepler WVC VS Police WVC
Kepler WVC ni ikipe yagize umwaka w’imikino mwiza aho yanabashije gutsinda amakipe bari bahanganye yose mu mikino yo kwishyura arimo APR, Police na RRA ndetse ntiyigeze itsindwa umukino n’umwe mu mikino yo kwishyura ya Shampiyona.
Kepler yasoreje imikino ya Shampiyona ku mwanya wa 2 n’amanota 29, mu mikino 12 yatsinzemo imikino 10 itsindwa imikino 2 gusa naho Police ifite igikombe giheruka cya Shampiyona yaritwaye bwa mbere yasoreje imikino ya Shampiyona ku mwanya wa 3 n’amanota 26, mu mikino 12 yatsinzemo imikino 9, itsindwa imikino 3.
Mu mikino 5 yahuje aya makipe yombi muri uyu mwaka w’imikino yarangiye Police itsinzemo imikino 4, naho Kepler itsinda umukino umwe ari nawo mukino rukumbi iyi kipe yatsinzemo Police kuva yashingwa muri 2024.
Bamwe mu bakinnyi bo kwitega mu ikipe ya Kepler WVC y’umutoza Siborurema Florien barimo Binta Fatoumata na Makuto Violette.
Bamwe mu bakinnyi bo kwitega mu ikipe ya Police y’umutoza Hatumimana Christian barimo Meldinah Sande, Ainembabazi Catherine na Ayepoe Sandra.