Ikipe ya Real Madrid yatandukanye n’umutoza Xabi Alonso ku bwumvikane bw’impande zombi nyuma y’amezi 7 yaramaze mu nshingano zo gutoza iyi kipe.
Kuri uyu wa mbere tariki 12 Mutarama 2026 nibwo Xabi Alonso yatandukanye na Real Madrid nyuma yo gustindwa na FC Barcelone ibitego 3-2 ku mukino wa nyuma w’Igikombe Kiruta Ibindi muri Espagne wabaye kuri iki Cyumweru tariki 11 Mutarama 2026.
Mu itangazo ryayo Real Madrid yagize iti,”Ikipe yacu irashimira Xabi Alonso n’abungiriza be ku bw’akazi bakoze muri iki gihe, kandi turabifuriza amahirwe mu buzima bushya.
Xabi Alonso wanakiniye Real Madrid nk’umukinnyi hagati ya 2009 na 2014 yahise asimburwa kuri uyu mwanya na Álvaro Arbeloa nawe wakiniye Real Madrid ndetse kuri ubu akaba yari umutoza w’ikipe ya kabiri ya Real Madrid.
Xabi Alonso w’imyaka 44 yatangiye gutoza Real Madrid tariki 1 Kamena 2025 avuye muri Bayer Leverkusen yagiriyemo ibihe byiza akayiha Igikombe cya Shampiyona y’Ubudage, akayigeza no ku mukino wa nyuma wa Europa League.
Xabi Alonso yagizwe umutoza wa Real Madrid asimbuye Carlo Ancelotti kuri ubu utoza ikipe y’igihugu ya Brazil.
Xabi Alonso wabwiwe ko azakomeza kwisanga muri Real Madrid asize iyi kipe iri ku mwanya wa kabiri muri Shampiyona ya Espagne, irushwa amanota 4 na FC Barcelone ndetse iri no ku mwanya wa 7 muri UEFA Champions League.