Kuri uyu wa kabiri tariki 22 Mutarama 2026 ikipe ya Rayon Sports yatangaje ko yamaze gutandukana n’umutoza w’umurundi Haruna Ferouz wari umutoza wa kabiri wungirije.
Haruna Ferouz yageze muri Rayon Sports muri Nyakanga 2025 ari umutoza wa mbere wungirije ku masezerano y’umwaka umwe.
Ferouz yazanywe kungiriza uwari umutoza mukuru Afahmia Lotfi nyuma y’uko Azouz Lotfi wari wazanywe n’umutoza mukuru atarafite ibyangombwa bimwemerera kuba umutoza wungirije.
Nyuma y’uko Afahmia Lotfi atandukanye na Rayon Sports, Ferouz yahise afata ikipe nk’umutoza w’umusigire kugeza ubwo iyi kipe yambara ubururu n’umweru yazanye Lomami Marcel nk’umutoza wungirije wa mbere ndetse izana Bruno Ferry nk’umutoza mukuru byatumye Haruna Ferouz ahita aba umutoza wa kabiri wungirije.
Amakuru aturuka muri Rayon Sports yemeza ko umutoza Ferouz ariwe wisabiye gutandukana n’iyi kipe nyuma y’umwuka mubi warumaze muri iyi kipe nyuma y’uko itsinzwe na APR FC ibitego 4-1 mu mukino w’Igikombe kiruta ibindi cya Super Coupe 2025.
Bivugwa ko uyu mutoza yahawe imishara y’amezi abiri ubundi atandukana n’iyi kipe mu bwumvikane ntaruhande rujyanye urundi mu nkiko.
Haruna Ferouz yatoje andi makipe atandukanye y’iwabo mu Burundi arimo Vital’O FC, Burundi Sport Dynamik na Flambeau du Centre.