Ikipe ya Stade Tunisien yageze ku mukino wa nyuma w’Igikombe Kiruta Ibindi muri Tunisia itsinze US Monastir ibitego 2-0 birimo icy’umunyarwanda Mugisha Bonheur “Casemiro”.
Kuri iki cyumweru tariki 27 Nyakanga nibwo kuri Stade Taieb Mhiri i Sfax ikipe ya US Monastir yakinaga n’ikipe ya Stade Tunisien mu mukino wa kamarampaka wo kugena ikipe izakina umukino wa nyuma w’Igikombe Kiruta Ibindi muri Tunisia na Espérance Sportive de Tunis.
Uyu mukino wabayeho nyuma y’uko ikipe ya Espérance Sportive de Tunis yegukanye ibikombi byombi bikinirwa muri Tunisia – Igikombe cya shampiyona n’igikombe cy’igihugu kandi ubundi amakipe yatwaye ibi bikombe ariyo akina ku mukino wa nyuma w’Igikombe Kiruta ibindi.
Ibi byatumye Stade Tunisien yatsindiwe ku mukino wa nyuma w’Igikombe cy’Igihugu na US Monastir yabaye iya kabiri muri shampiyona, zikina umukino wa kamarampaka ngo haboneke ikipe izakina na Espérance Sportive de Tunis ku mukino wa nyuma w’Igikombe Kiruta ibindi muri Tunisia.
Uyu mukino warangiye Stade Tunisien itsinze US Monastir ibitego 2-0 harimo igitego cy’umunyarwanda ukina mu kibuga hagati Mugisha Bonheur “Casemiro” watsinze penaliti ku munota wa 34 ndetse n’igitego cya Khalil Ayari cyo mu minota ya nyuma y’igice cya mbere bituma Stade Tunisien igera ku mukino wa nyuma.
Ku Cyumweru tariki 3 Kanama 2025 kuri stade Hammadi Agrebi i Tunis mu murwa mukuru wa Tunisia nibwo hateganyijwe umukino wa nyuma w’Igikombe Kiruta Ibindi muri Tunisia hagati ya Stade Tunisien na Espérance Sportive de Tunis.
Mugisha Bonheur “Casemiro” yageze muri Stade Tunisien muri 2024 asinya amasezerano y’imyaka 3 nyuma yo kuva muri Al Ahly Tripoli yo muri Libya.
