Umukinnyi w’umunya-Tanzania Mbwana Ally Samatta w’imyaka 32 yasinye amasezerano y’umwaka umwe muri Le Havre yo mu Bufaransa bimugira umukinnyi wa mbere uturuka muri Tanzania ukinnye muri shampiyona y’Ubufaransa.
Ally samatta ukina nka rutahizamu yerekeje muri Le Havre nyuma yo gutandukana na PAOK Thessaloniki yo mu Bugereki yaramazemo imyaka 2.
Ally Samatta watwaranye igikombe cya CAF Champions League muri 2015 na TP Mazembe yo muri Repubulika Iharanira Demokarasi ya Kongo agiye muri Le Havre gusimbura rutahizamu w’umunya-Misiri Ahmed Hassan Koka werekeje muri Al-Ettifaq muri Arabie Saoudite.
Mu mwaka ushize w’imikino, Ally Samatta yakinnye imikino 20, atsinda ibitego 5, atanga imipira 3 yavuyemo ibitego.
Ally Samatta yakiniye andi makipe arimo  arimo Simba yo muri Tanzania, Aston Villa yo mu Bwongereza, Fenerbache yo muri Turukiya, na Royal Antwerp na Genk zo mu Bubiligi.
Ally Samatta amaze gukinira ikipe y’igihugu ya Tanzania imikino 83 kuva muri 2011 yahamagarwa bwa mbere, yayitsindiye ibitego 22 usibye ko hashize imyaka 3 ntagitego arayitsindira. Ibi bimugira umukinnyi wa gatatu umaze gutsindira iyi kipe y’igihugu ibitego byinshi nyuma ya Mrisho Ngasa wayitsindiye ibitego 25 na Simon Msuva wayitsindiye ibitego 23.