Ikipe ya Manchester United yasinyishije umukinnyi ukinira ikipe y’igihugu ya Cameroon, Bryan Mbeumo w’imyaka 25 y’amavuko imuvanye muri Brentford nayo yo mu Bwongereza.
Mbeumo ni umukinnyi ukina ku ruhande asatira izamu, Manchester United yamuguze kuri miliyoni £70 asinya imyaka itanu akinira iyi kipe izwi nk’Amashitani y’Umutuku.
Akimara gusinyira Manchester United, Mbeumo yagize ati,”Narimfite gufatirana aya mahirwe nkasinyira ikipe y’inzozi zange, iyo nambaraga umwambaro wayo nkiri umwana.”
Bryan Tetsadong Marceau Mbeumo yavutse tariki 7 Kanama 1999, avukira i Avallon mu Bufaransa.
Yatangiriye gukina umupira w’amaguru mu ikipe y’abato ya Troyes yo mu Bufaransa mbere yo kuzamuka mu ikipe nkuru ya Troyes muri 2018 yamazemo umwaka umwe mbere yo kwerekeza muri Brentford.
Mbeumo yakiniye Brentford imikino 242 ayitsindira ibitego 70, atanga imipira 51 yavuyemo ibitego mu gihe cy’imyaka itandatu yarahamaze.
Mu mwaka ushize w’imikino, yakiniye Brentford imikino 42, atsinda ibitego 20, atanga imipira 9 yavuyemo ibitego.
Ibi bitego byose yatsinze muri shampiyona y’Ubwongereza Premier League bijya kungana n’ibitego byose ba rutahizamu ba Manchester United batsinze muri Premier League mu mwaka ushize w’imikino.
Abataka ba Manchester United barimo Amad Diallo watsinze 8, Alejandro Garnacho watsinze 6, Rasmus Højlund watsinze 4 na Joshua Zirkzee watsinze 3 bivuze ko barusha Bryan Mbeumo igitego 1 uteranyije ibitego byabo byose.