Umusirikare ufite ipeti rya Jenerali mu gisirikare cya Guinea-Bissau Horta N’Tam yarahiriye kuba Perezida w’inzibacyuho w’iki gihugu nyuma y’umunsi umwe Perezida Umaro Sissoco Embaló ahigitswe ku butegetsi.
Ku mugoroba wo kuri uyu wa gatatu tariki 26 Ugushyingo 2025 humvikanye amasasu mu murwa mukuru Bissau mbere y’uko abasirikare bari bahagarariwe na Jenerali Denis N’Canha bagaragara kuri televiziyo y’igihugu bavuga ko bahagaritse amatora yabaye ku cyumweru, kuri uyu wa kane akaba aribwo hari gutangazwa ibyayavuyemo.
Bavuze ko bari gukora ibi kugira ngo barinde igihugu umugambi mubisha w’abanyapolitike batatangajwe amazina bari barashyigikiwe n’umucuruzi ukomeye w’ibiyobyabwenge bashaka guhungabanya igihugu.
Abo basirikare bakomeje batangaza ko bafunze imipaka kandi bashyizeho gahunda y’umukwabu n’amasaha abantu batagombaga kurenza bataragera mu ngo zabo.
Nyuma y’uko Perezida Umaro Sissoco Embaló w’imyaka 53 waruri kwiyamamariza kuyobora manda ye ya kabiri ahiritswe ku butegetsi yarafashwe arafungwa ariko kugeza ubu ntiharamenyekana aho afungiye.
Umuryango w’Ubumwe bw’Afurika n’igihugu cya Portugal cyahoze gikoroniza Guinea-Bissau bamaganye ibiri kubera muri iki gihugu aho Portugal yasabye ko hasubizwaho inzego zemewe n’amategeko, minisiteri y’ububanyi n’amahanga yayo isaba “abari muri ibi byose kwirinda ibikorwa byose by’urugomo ku nzego za leta cyangwa ku baturage.”
Ni ku nshuro ya kane Guinea-Bissau ituwe n’abarenga miliyoni 2 ndetse iri mu bihugu bikennye ku isi ibayemo ihirikwa ry’ubutegetsi hatabariwemo igihe zageragezwaga ariko zigapfuba.