Damaria Franklin ukinira ikipe ya Patriots BBC yaciye agahigo ko gutsinda amanota menshi mu mukino umwe wa Shampiyona y’u Rwanda mu bagabo nyuma yo gutsinda amanota 66 mu mukino ikipe ye ya Patriots BBC yatsinzemo EAUR BBC amanota 103-78.
Ku wa gatanu tariki 3 Mata 2026 no kuri iki cyumweru tariki 5 Mata 2026 hakinwaga imikino yo kwishyura y’umunsi wa 1 wa Shampiyona y’abagabo mu Rwanda, imikino yose yabereye muri Petit Stade.
Ku wa gatanu ikipe ya AZOMCO yatsinzwe Patriots BBC amanota 85-51, Damaria Franklin yitwaye neza muri uyu mukino atsinda amanota 30, akora rebounds 10, atanga imipira 3 yavuyemo amanota ndetse yambura umupira (Steals) inshuro 5.
Undi mukino wakurikiyeho ku wa gatanu wahuje UGB na EAUR BBC.
Uyu mukino warangiye UGB itsinze EAUR BBC amanota 106-97, Amotoe James Kofi yongera kubera inkingi ya mwamba ikipe ya UGB ayitsindira amanota 38 muri uyu mukino, akora rebounds 12, atanga imipira 6 yavuyemo amanota ndetse yambura umupira inshuro 3.
Umukino ubanza wakinwe tariki 8 Gashyantare 2026 wari warangiye ikipe ya EAUR BBC yazamutse uyu mwaka itsinze UGB amanota 78-63.
Kuri iki cyumweru tariki 5 Mata 2026 nabwo imikino yarakomeje hakinwa imikino ibiri harimo umukino wahuje AZOMCO na Inspired Generation.
Uyu mukino warangiye ikipe ya AZOMCO ibonye intsinzi ya 3 muri Shampiyona itsinze Inspired Generation yazamutse uyu mwaka amanota 69-64, Jarode Aworet yitwaye neza muri uyu mukino atsindira AZOMCO amanota 23, akora rebounds 17, atanga imipira 2 yavuyemo amanota ndetse yambura umupira inshuro 2.
Umukino wasoreje indi ni umukino wahuje ikipe ya Patriots BBC n’ikipe ya EAUR BBC ari nawo Damaria Franklin yandikiyemo amateka yo gutsinda amanota menshi mu mukino umwe wa Shampiyona y’u Rwanda.
Uyu mukino warangiye ikipe ya Patriots BBC itsinze EAUR BBC amanota 103-78, Damaria Franklin wa Patriots BBC atsinda amanota 66, akora rebounds 6, atanga imipira 2 yavuyemo amanota ndetse yambura umupira inshuro 3.
Umunyamerika w’imyaka 26 y’amavuko Damaria Franklin ukinira Patriots yaciye agahigo kari gafitwe na Niyonkuru Pascal uzwi nka Kaceka watsinze amanota 60 mu mukino umwe ubwo yakiniraga APR BBC icyo gihe yatsinze Rusizi BBC amanota 139-58 muri 2019 ndetse na Zion Style watsinze amanota 59 mu mukino APR BBC yatsinzemo Inspired Generation amanota 141-47 muri 2024.
Kugeza ubu Damaria Franklin niwe uyoboye abandi mu gutsinda amanota menshi muri Shampiyona y’uyu mwaka muri rusange, amaze gutsinda amanota 258, akurikirwa na Amotoe James Kofi wa UGB umaze gutsinda amanota 218, Ronald Nato Kolmia ukinira EAUR BBC ni uwa gatatu n’amanota 150.
Nyuma yo gutsinda imikino ibiri mu mpera z’iki cyumweru, Patriots BBC yahise ifata umwanya wa 2 ku rutonde rw’agateganyo rwa Shampiyona n’amanota 15, ifite intsinzi 6 mu mikino 9, mu gihe urutonde rukiyobowe na APR BBC n’amanota 15, ifite intsinzi 7 mu mikino 8.
Ikipe ya Inspired Generation niyo kipe itaratsinda umukino n’umwe kuva Shampiyona yatangira kugeza ubu, yatsinzwe imikino 9 yose imaze gukina ndetse ifite umwenda w’amanota 343 kuko imaze gutsinda amanota 514, itsindwa amanota 857.
