Ikipe ya Crystal Palace yatsinze Liverpool iyitwara igikombe kiruta ibindi mu Bwongereza, FA Community Shield kuri penaliti 3-2.
Kuri iki cyumweru tariki 10 Kanama kuri Sitade ya Wembley nibwo ikipe ya Crystal Palace yatwaye Igikombe cy’Igihugu, FA Cup n’ikipe ya Liverpool yatwaye Igikombe cya Shampiyona y’Ubwongereza zahuriye ku mukino w’Igikombe Kiruta Ibindi mu Bwongereza, FA Community Shield gitangira umwaka w’imikino.
Liverpool yahabwaga amahirwe menshi yo kwegukana iki gikombe yatangiye ibona igitego cya Hugo Ekitike ku munota wa 4. Uyu aherutse kugera muri iyi kipe avuye muri Eintracht Frankfurt mu Budage.
Crystal Palace yaje kwishyura iki gitego kuri penaliti ya Jean-Philippe Mateta ku munota wa 17 nyuma y’ikosa Virgil Van Dijk yarakoreye Ismaïla Sarr.
Ku munota wa 21, Liverpool yabonye igitego cya kabiri cyatsinzwe na Jeremie Frimpong gusa iki gitego nacyo Crystal Palace yaje kukishyura gitsinzwe na Ismaïla Sarr ku munota wa 77.
Iminota 90 y’umukino yarangiye amakipe yombi anganyije ibitego 2-2 hahita hiyambazwa penaliti zarangiye Crystal Palace itsinze Liverpool kuri penaliti 3-2.
Liverpool yatangiye ihusha penaliti yatewe na Mohamed Salah akayitera hejuru y’izamu naho penaliti ya kabiri Alexis Mac Allister yayiteye ariko umuzamu Dean Henderson ayikuramo.
Crystal Palace yatangiye itsinda penaliti ya Jean-Philippe Mateta gusa nayo yahushije penaliti ya kabiri ya Eberechi Eze yakuwemo n’umuzamu wa Liverpool Alisson Becker.
Penaliti ya gatatu ya Liverpool yatsinzwe neza na Cody Gakpo ndetse n’iya gatatu ya Crystal Palace itsindwa neza na Ismaïla Sarr, penaliti ya kane yahushijwe ku mpande zombi aho Harvey Elliot wa Liverpool yayiteye ariko umuzamu akayikuramo na Borna Sosa wa Crystal Palace umupira yawuteye ku mutambiko w’izamu.
Dominik Szoboszlai yatsinze penaliti ya gatanu ya Liverpool, bivuze ko Crystal Palace nayo yasabwaga gutsinda penaliti ya gatanu kugira ngo ihite yegukana igikombe ndetse yabigezeho nyuma y’uko Justin Devenny w’imyaka 21 ayitsinze zikaba penaliti 3-2.
Iyi ni FA Community Shield ya mbere Crystal Palace yegukanye mu mateka yayo ndetse yabaye ikipe ya mbere yegukanye iki gikombe ari ku nshuro ya mbere igihataniye kuva mu 1975 ubwo Derby County nayo yabikoraga.
Iki kibaye igikombe cya kabiri gikuru (Major trophy) ikipe ya Crystal Palace itwaye kuva yashingwa nyuma ya FA Cup yatwaye muri Gicurasi 2025 itsinze Manchester City igitego 1-0.
Ibindi bikombe Crystal Palace yatwaye birimo Igikombe cya shampiyona y’Ikiciro cya Kabiri mu Bwongereza yatwaye inshuro 2 mu 1994 na 1979 ndetse n’igikombe cya shampiyona y’ikiciro cya gatatu yatwaye mu 1921.
Iteka Community Shield ikinwa mbere y’icyumweru kimwe ngo shampiyona y’Ubwongereza itangire n’ubundi kuri iyi nshuro ni uko, iyi shampiyona ikurikirwa na benshi ku isi iratangira kuri uyu wa gatanu tariki 15 Kanama 2025, ikipe ya Liverpool yakira Bournemouth.